港人學樂器小心被騙財——大提琴掠水記

呢個題目，本公多年前已想講，考慮到阻人發財，思前想後，而家先講。

關於學琴，學弦樂，首先你要有一隻提琴，以大提琴來講，有
1 最平的機器做的琴（幾千蚊）
2 中國手工做的琴 （低於五萬）
3 平價歐洲琴 （幾萬，低於十萬）
4 歐洲琴 （十幾廿萬）
以上只係大約，價錢超出個範圍如中國琴十萬都有，歐洲琴有幾十萬，古董琴幾百幾千萬，呢個分類不包所有，只係一個大約的概念。

大部分學生都係用緊2的中國手工琴，少部分用3或4的歐洲琴。我想講一個現象，係老師叫學生買琴。
通常佢地有門路攞到幾千銀成本的中國手工琴，然後賣畀學生2，3萬，同佢地講好抵呀，超值呀！
如果學生係用緊1最平機器琴，咁就幫趁買番隻手工琴啦，皆大歡喜，問題係，大部分學生已經用緊2中國手工琴，仲點同你買多一隻呢？然後老師就情緒勒索，學生拉唔好，就會話因為個琴唔好，只要換了我的琴，就會突飛猛進，阿邊個同另外阿邊個買咗都話個琴好呀。

情況係，學打羽毛球，教練幫你揀支靚拍，好過你係舖頭買，一千幾百，有限錢，或者上手工勞作堂，材料要向老師買，都是濕碎錢，錢係要畀人賺的！

但係呢度講緊皮皮聲，唔係濕碎錢，而且二手琴市場好細，賣出去唔容易，價錢好低，香港地寸金尺土，仲要佔地方，即係擺明被勒索，如果唔係冇好日子過，以後上親堂有排煩。

會唔會真係個學生有換琴的需要呢？
如果真係有需要，正派的老師會refer佢去邊度（店）或搵邊個人（maker）幫你，堅持學生買自己來源的, 一定有景轟。
其實好多家長係社會打滾，會聞到陣不良硬推銷的味，只係為了和諧，唔踢爆，有閒錢比得起，當畀黑社會保護費，換來之後安寧，你畀了錢，之後個老師就會話，自從佢換了琴，真係好大進步呀！兒子生性x母感安慰。

我見過比較有技巧的，係咁意問下家長：使唔使買琴？我有門路喎，唔需要呀，咁算啦！你要買就話我知。
呢件事就完了，大家好落台。

香港係金融城市，大把投資工具，股，樓，基金，外匯，玩到你唔玩，而家仲有crypto, 而且香港稅率低，外國有資產增值稅，真係想資產增值，用財技光明正大係自由市場賺錢，自己努力工作賺錢，總好過昆鳩啲家長，可能係貧窮限制想像，要賺快錢只有向家長下手。
新聞有報，有個古箏老師，早年有學生交學費用比特幣，佢收了，自己又投資，而家已揸住值幾千萬的比特幣了，我肯定佢唔使逼家長買琴，自己有財技，零舍有class。

我的結論係，家長係唔打算買琴亦唔願意買琴但被硬推銷買琴時應立即把老師換掉，可保荷包平安。

作者：莊公公

欲練神功，必先自宮 作為公公，最愛指點別人行房 若有日不幸中風，我會希望係馬上風

閱讀後覺得好，請多多讚好及分享～：）