情侶保鮮大法

 

「其實你驚唔驚拍拖耐咗會淡?」朋友晴晴說。
「唔驚喎,我咁耐都無試過淡,反而有試過發現大家唔夾,不過通常好快就知,好似返新工咁,probation內就知要唔要轉工。」我說。
「但係拍拖來來去去都係做果啲嘢,食飯、睇戲、行街,你唔覺得悶咩?」晴晴說。
「咁如果係同鍾意嘅人一齊,就算咩都唔做齋坐喺度hea都sweet㗎喎。」我說。
「頂問錯人,唔記得咗你仲係熱戀當中,曬死人咩大佬。」晴晴說。

身邊都有愛情長跑嘅人,中學開始拍拖,拍咗十年,然後結婚生小朋友,從來無聽過佢地話淡,但初初一齊嘅心動感覺當然已經變咗做親情,好似一家人咁,生咗小朋友就更加將心思轉移咗。有啲人會話「唔結就分」,覺得兩個人一齊咗一段時間,就要搵啲嘢去刺激吓,或者係希望兩個人一齊成長,進入另一個階段,其實結婚同生小朋友真係好睇兩個人嘅意願,亦唔係一定要做咗先叫「成功」嘅。

結婚生仔對我嚟講就太長遠喇,所以講返拍拖先,我發現拍拖真係好易令人變懶,初初出街都仲會戴吓 con化下妝,夾直啲頭髮,噴吓香水,著吓裙仔,日子耐咗,好快就懶到變咗素顏出街,頭髮成扎草咁,身形又走樣,成日聽人講拍拖開心幸福肥,其實某程度上係因為懶咗,運動都唔做,唔使再扮靚去吸引人,但係咁係唔得㗎!女人無論拍唔拍拖,都唔應該懶,為自己又好,為另一半都好,久唔久或者喺啲特別日子,都要扮返靚靚唔好懶。

除咗keep返靚靚之外,同另一半培養共同興趣都有助保鮮,例如係行山、做運動、睇戲、煮飯仔等等,都係好sweet嘅事嚟,而且又唔係高消費嘅活動,如果做帶氧運動仲可以釋出「安多酚」,減壓同令人開心,至於做咩類型嘅運動就睇番大家喜好啦唔詳細講喇。

第三個係製造小驚喜,唔一定吓吓要搞場大龍鳳先算係驚喜,平時返工都忙到死邊得閒搞咁多嘢,可能突然接放工、寫張卡、或者買咗佢鍾意嘅嘢食等等,生活上微細嘅東西已經可以,不過真係要了解另一半鍾意咩先好搞,唔係一陣驚喜都變驚嚇就笑死人。

第四個係参與多人活動,即係帶另一半同自己嘅朋友一齊玩,平時得兩個人嘅話,去大排檔都只係叫得兩個餸,一班人就唔同喇,可以大魚大肉開心share,而且多人又多啲嘢玩,例如玩boardgame、switch、打牌、燒野食等等,除咗朋友,亦可以見埋屋企人,派埋定心丸,而且喺屋企hea絕對係慳返好多錢,夏天咁熱真係唔多想出街。

第五個係畀大家有各自獨處嘅私人時間,拍拖唔使24小時都痴埋一齊,小別勝新婚,除咗愛情,仲有親情、朋友、工作等等,另一半都要去同啲兄弟去吹吓水飲吓嘢,唔使吓吓都管住晒嘅,我都要私人時間寫嘢啦,唔係邊有而家呢篇文出。

最後,我想講以上呢五樣其實都唔重要(係咪即刻想打我XD),因為最重要嘅保鮮大法其實係「溝通」,每對情侶嘅相處方式都唔同,喜好又唔同,最好當然係同另一半溝通,睇佢鍾意咩啦,兩個人相處係要互相體諒同遷就,唔會有人同你完全100%夾到,「相處」呢一課係要學成世,你搵到同你上堂嘅人未?

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 215962
Date: 2021-05-19 20:48:49
Generated at: 2021-06-21 03:10:18
Permalink: https://www.vjmedia.com.hk/articles/2021/05/19/215962/情侶保鮮大法