2020TVB份業績——間公司由內爛到外

無聊打開2020TVB份業績望望，可能Old News is so 唔識串，不過可以分享下：

1.去年都仲有10億廣告收入（點解仲有人會去TVB落廣告），雖然跌左一半，不過以今年TVB個情況，可能更惡劣，VIU TV搶廣告真係屌打，個個爭住落《調教你MIRROR》。

2.原來佢拎「保就業」拎左兩億幾。

3.唔好講星美同一大堆債券爛數，佢搵銀行借貸＋發票據合共借貸有37.52億；而（存款現金＋債券）－（票據＋銀行借貸）＝仲有9300萬港紙，假如今年廣告收入再跌一半，希望班票據債主同銀行佬唔好Call佢loan。

4.佢有個5億美元票據今年到期。

5.佢有一大筆收入係靠中港合拍電視劇收益帶動，約8.03億，包括「使徒行者3」、「踩過界II╱盲俠大律師2020」及「陀槍師姐2021」，可能做開大灣區生意，「陀槍師姐2021」我俾過機會佢，但我捱唔到五集。

5.做左幾年財仔，睇過上百間企業財報，個人分析係：TVB間公司由內爛到外，電視劇甚至綜藝有幾爛大家已經有公論；問題係公司財政已經有好嚴重問題，第一就係陳國強在位時候用公司錢買落一大堆垃圾債而目前無法兌現，公司財政已經五癆七傷，呢個都唔係最重點，重點係公司問銀行借錢加發票據差落一大堆街數，就算現金write off埋呢筆街數，呢個現金流應該最多玩埋呢幾年，如果持續落去，除非佢有幾套電視劇係大陸大賣／香港廣告商突然良心發現要係TVB落廣告，否則有生之年係確實可以見到兩間電視台執笠嘅奇景，應該係全世界公營廣播中難得嘅局面。

作者：庵念慈

娛樂圈的後生老海鮮，日日被容總追稿的追夢人。現為文化研究碩士學生。

閱讀後覺得好，請多多讚好及分享～：）