你係好適合呢份工,可惜你太貴喇

 

「你有做過start-up同傳統大公司,agency同in-house都做過,好適合我地嘅要求,我覺得你可以勝任到呢個post,可惜你人工太高喇,我地無咁多budget,呢個價係咪最低喇?」CEO James說。
「係。」我說。
「我都明嘅,你做咗咁多年嘢,人工一定會要求高啲,如果你少幾年經驗就好喇。」James說。
「。。。」我不發一言,因為唔知可以畀咩反應。
「你係適合嘅,但最近都有好多CV入,我in埋其他人再考慮吓,有消息會盡快通知你。」James說。

市道唔好就係人都知,但無論個市點,人都係要搵食,工都一樣要搵,expectedly salary我都改過幾次,雖然係愈改愈低,不過我有個宗旨,就係點都唔可以低過上一份。由啱啱畢業到而家,見過N咁多次工,就會發現其實經驗少同經驗多都係一樣會畀人嫌棄,每個老闆都係想搵一個有好多年經驗,一返工就即刻上手唔使人教,但收緊fresh grad價錢嘅員工,cost effective要去到最大,我明白嘅,但係come on James,唔好太天真啦,呢個機率其實係極細。

正如打工仔都會FF自己可以搵到一份無乜嘢做,可以成日hea,準時收工但人工高福利好嘅工,唔係無,難啲囉。好多時想人工高就要付出多啲,屎又執多啲,氣又受多啲,加班又多啲,但係如果你換嚟嘅係滿意嘅人工,咁都叫做有啲安慰,最慘係做到隻狗咁都係得果少少人工,條氣就會好唔順,好想轉工,但係如果要成家立室,租樓/供樓就唔會敢裸辭,而且樣樣都要慳到盡,有時食餐好少少都會覺得肉赤。

見工其實就好似speed dating咁,傾吓計了解吓大家夾唔夾,公司對呢個位嘅要求,自己嘅工作經驗同學歷係咪可以配合到?你要嘅人工,公司又畀唔畀到?人揀你時你亦可以揀人,要搵到份適合嘅工,其實同搵男朋友一樣咁難, 就算搵到新工,都有適應期,見工一回事,做落可能又係另一回事,同事上司難唔難夾?工作內容應唔應付到?好多未知數,但成功轉到工總算係一個新開始。

「喂,恭喜你!終於搵到Full Time,係咪嫌你貴果份呀?」朋友阿花說。
「唔係呀,另一份嚟,其實係開心嘅,終於可以離開舊公司,但心情有啲覆雜。」我說。
「點解呀?唔捨得男朋友仔呀?」阿花說。
「一嚟啦,二嚟新公司office都未有,又第一次同鬼佬做嘢,驚自己handle唔到同埋覺得好無安全感。」我說。
「唔得咪再轉囉,你都頹咗幾年啦,係時候要有啲衝擊!相信自己,你會慢慢進步。」阿花說。
「謝謝你。」我說。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 216300
Date: 2021-06-20 12:20:41
Generated at: 2021-08-04 01:31:07
Permalink: https://www.vjmedia.com.hk/articles/2021/06/20/216300/你係好適合呢份工,可惜你太貴喇