人哋炒股票，我就炒offer

「我已經喺呢間公司做咗四年，中間有人辭職我仲要頂埋佢啲嘢，晚晚加班，點知公司竟然只係加$300畀我，當我乞兒呀？我寧願佢唔加好過！」Ryan生氣地說。
「嗱，條氣唔順係得兩個辦法解決嘅啫，一係轉工，一係食餐好嘅，瞓醒又係一條好漢，繼續準時返工。」我說。
「鬼唔知咩，我都係呻吓啫，你估話走就走咩，不過其實都有睇緊啲工，啱咪send去搏吓interview囉。」Ryan說。
「啱呀，魚唔過塘唔肥。」我說。

最近呢一兩年，好多公司都會一句話個市唔好呀就要求同事凍薪、放無薪假，甚至減薪，希望大家一齊共渡時艱，明白加理解嘅，但奈何有啲公司明明疫情下繼續賺大錢，都會用呢個原因做藉口去慳錢，真係會令人條氣好唔順，有啲公司更加係只共患難不共富貴，蝕錢果陣要減薪，賺錢追到target話出花紅，仲講到明出幾多錢，同事搏命追，追到又點？佢側側搏當無咗件事。

一直喺同一間公司度做，人工可能真係加得唔多，所以通常我都會好好把握每次轉工嘅機會去幫自己加人工，第一次炒offer係無心，純粹有次係轉咗新工做咗一陣覺得唔啱，於是拎住新工嘅offer再去搵工，然後第二份新工又唔啱做，又再拎呢個offer去搵新工，於是就變相加咗幾次人工，先發現咗炒offer呢樣嘢，不過果陣個市係好過而家，我人工又低啲，所以可能易跳啲。

「你期望人工係$20,000，但係我哋無咁多錢請你，最盡$16,000，你OK？」GM Louis說。
「我要考慮吓，因為我已經有另一個offer係$18,000。」我說。
「咁呀，其實我都畀到$18,000，你OK？」Louis說。
「我真係要考慮吓，因為果邊有雙糧同work from home。」我說。
「我都畀到你，其實我真係好有誠意請你，一係咁，你要$20,000，我畀你，你肯唔肯？我覺得你真係好適合。」Louis說。
「我考慮吓先。」我說，唔知點解女人直覺突然sense到有伏味。

老老實實，如果你真係咁有誠意請我，你最初就唔會同我講最盡$16,000啦腦細，又或者而家嘅求職者慣咗標高價，然後腦細又慣咗壓價，恐性循環，其實我今次都係無心炒呢個offer返嚟，只係工作內容真係唔太啱做，所以低價唔會考慮先咁講，而且我真係已經有其他offer。炒offer，通常係唔太著緊份工先夠膽炒，因為都有機會炒燶，相反，對住自己想做嘅工，通常都會淆底畀人壓咗價，negotiation真係好重要，又係一樣有排學嘅嘢，努力努力。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）