那些難以名狀的精神病——咩叫唔正常 (Abnormal)?

 

精神病呢個字真係好heavy,16歲嗰年有情緒病,睇醫生都係要睇精神科,包藥大大隻字寫住精神科藥物,仲要有個骷髗骨頭公仔寫住毒藥。

簡單講吓,我真正被醫生diagnosis嘅有抑鬱症( depression disorder)、強迫症(obsessive compulsive disorder)、腸胃焦慮症(irritable bowel syndrome),仲有話我有暴食(bulimia)symptoms。然後去見counsellor嘅時候做test,社交障礙(social anxiety)得分好高。

以前細個會將呢啲嘢同人講,後尾發現一來無用,人哋聽完都幫唔到你解決啲咩,二嚟真係會有啲人因為覺得你太負面而疏遠你。其實我由細到大都係樂觀正面L,我深信我一直都有呢面喺到嘅,所以自此我就用呢面嚟同人相處,多愁善感嘅同諗好多嘅我,就留番比熟人同我自己。

但係我發現朋友由生到熟嗰吓好難處理。當我想expose我自己陰暗啲嘅一面嗰陣,啲人嘅反應不外乎:

「強迫症?我都有呀,排好啲嘢丫嘛?」
「點會呀?你自己諗咋?」
「你係真係醫生diagnose咗?有無食藥先?」
「你唔似喎。」
「係未你自己覺得呀?」

有時我覺得,我要prove比人睇自己有病呢件事真係好可悲。

「係呀,我上年停咗藥,但依家有時都會覺得辛苦。」我嘗試解釋,真係醫生話我有病,真係要食藥⋯⋯

真係辛苦。

「咁即係好番啦。」然後啲人就會咁講。

人只會相信自己想相信嘅嘢,如果你平日開開心心活潑外向嘅,佢認定你係一個開心嘅人,就唔會想浪費力氣去改變你喺佢心目中既定嘅形象。

其實我諗咗好耐,究竟我要點樣表達我嘅唔開心同痛苦比人知呢–喺即使你有病,人哋都會叫你拎prove出嚟嘅時候。社交障礙我係未就唔可以講呢?話哂醫生無diagnose 過–順帶一提,diagnosis都唔代表咩,情緒病醫生九成都係聽你self-report講嘅symptoms診症,我都唔明點解啲人要咁執著diagnosis。

我諗由頭到尾,「有無病」都唔重要,我想表達嘅亦都唔係「我有病」,而係「我辛苦」。

以前曾經同前男友講我病發好辛苦,佢第一句就問:「你係未今日無食藥呀?」–我諗,如果你用病理角度嚟睇我,你覺得我有病定無病,我都唔會開心。

大學讀心理學嗰陣有科叫Abnormal Psychology,個professor成個course都係咁強調「正唔正常」無一條清楚嘅界線,正唔正常係一個連續體 (continuum),唔會有個test你做完過50就唔正常。唔通51唔正常,差一分50就正常咩?比起「有無病」,「正唔正常」,更加重要嘅係你自己點諗。有病嘅人可以同個病和諧共處,無病嘅人都可以好辛苦,當時professor講咗幾個criteria嚟決定一個人係未真係「唔正常」,我依稀記得有「有幾影響日常起居」同「自己主觀感覺(心情)」(好似係)。

雖然DSM(用嚟比心理學家/醫生診症嘅天書)入面有寫「嗱,中咗呢度幾多個symptoms呢,你就有depression啦」,但呢啲其實都係方便專業人士睇症,一個有血有肉嘅人,唔應該用「有病VS無病」、「正常VS唔正常」嚟定義。

或者,如果呢個世界大家睇嘢可以open-minded 啲、有同理心啲,呢個世界就會變得友善啲。

當你有個朋友同你講佢覺得自己有乜病有咩煩惱,你又唔係要幫佢診症,以上嗰啲criteria真係一啲都唔重要。因為由頭到尾佢想表達嘅都唔係我有病,而係⋯⋯

我好辛苦。

 

 

作者:白告沂

白告沂
CHAOTIC系女子,熱愛自由雙子座Slasher,乜都寫。都係想有個地方暢所欲言,現實中是個毒L。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 216522
Date: 2021-07-02 18:05:27
Generated at: 2021-08-03 18:18:45
Permalink: https://www.vjmedia.com.hk/articles/2021/07/02/216522/那些難以名狀的精神病-咩叫唔正常-abnormal?