我去到2021年先唔再睇TVB——正向聯想 (Positive Association)

 

二零二一年,我終於唔再開電視睇TVB,轉睇NETFLIX嘅美劇韓劇,先如夢初醒咁發現TVB嘅劇情真係好爛,講緊連韓劇的狗血劇情都好過佢。

五六年前,身邊已經無乜朋友會打開電視睇TVB,但我依然覺得TVB超級吸引,就算劇集的橋段永遠都好似科幻/特技片咁離地(徒手攀石),而結局永遠一係就充滿歡樂(BBQ大團圓結局),一係就慘到癲(啲人死Q哂)。

我真係有諗過點解我咁鍾意睇TVB,或者就係因為劇集嘅橋段永遠有路可以捉,我今年廿五歲,佢嘅橋段同我五歲睇嗰陣Keep到一模一樣!女人個樣Keep唔到永遠一樣、樓價Keep唔到一樣,呢個世界入面永遠不變嘅,或者只有TVB嘅橋段同打工仔嘅人工。呢種熟悉嘅親切感,令我睇親TVB都諗番起我細個開心無憂無慮嘅時光。

「嘩,BB,你睇下孫悟空幾犀利,佢一飛就飛咗上天!」回憶入面,我哋一家人每晚都會坐埋一齊睇電視,我呀嫲最鍾意聲音導航咁,一路睇一路engage 我。我記得爺爺嫲嫲坐喺沙發嘅左邊,爸爸媽媽坐喺沙發嘅右邊,我坐喺中間。間屋好細,個廳好細,大家坐到好逼。

「孫悟空估你二十啖飲完、豬八戒估十五啖、沙僧估廿五啖、唐三藏估三十啖,你試下數下你幾啖飲完,睇吓邊個估啱?」睇西遊記嗰排,我呀爺發明咗個方法氹最憎飲湯嘅我飲湯,個方法係有用嘅,起碼我真係肯飲哂啲湯,有時我會為咗比豬八戒贏,專登大啖啲飲(呀爺個方法有Bug,豬八戒估嘅數永遠都最細)。

其實五歲嘅我真係唔係好睇得明啲劇做緊咩,不過同成家人一齊睇,佢哋笑我就笑,得閒問吓呀爸呀媽「點解呢個人個樣咁得意嘅?佢係咪妖怪嚟㗎?」都幾開心。

大過咗之後,就算TVB劇情幾爛都好,唔開心嘅時候打開電視嚟睇,見到熟悉嘅劇情同橋段,真係好似番番細個咁,心情即刻好番。其實有呢個作用嘅唔只TVB,有生熟蛋啦–呀爺以前好鍾意整生熟蛋比我食,一隻生生地嘅蛋擺喺個杯上面,用隻羹潷嚟食,細個我覺得係人間美食嚟;又有怕醜草–因為呀爸好鍾意帶我去公園搵樹枝督啲怕醜草,夠我玩一個下晝;又有雪蛤膏–呀嫲最鍾意整雪蛤膏我食,放學番去見到有得食會好開心;又有明治咖啡糖–我呀媽最鍾意買比我食,但要成績好先有。

令我更難放棄TVB嘅原因,係今時今日呀嫲已經離開咗,之後好多年都無食過雪蛤;呀爺對手震到字都寫唔到,唔好話煮蛋;街上面再買唔到明治咖啡糖;公園啲怕醜草都唔知點解無哂;依家間唔中番屋企,呀爺好早就會入房瞓,呀爸呀媽無以前咁有ENERGY,多數都會入房攤喺到睇電視,睇一陣就瞓。

我諗我唔係好想再面對呀嫲離開嗰陣嘅感覺,所以每一次番屋企見到呀爸呀媽呀爺老咗,我都覺得好驚,驚到愈嚟愈少番去。直到最近呀爺突然行唔到路,要用輪椅出入,我驚我再唔同佢相處多啲,就唔會再有機會。於是我番去同佢煮下野食、畫下畫,發現佢對手已經震到字都寫唔到。

嗰一日,我好似終於接受咗–世界唔會永遠好似我五歲嗰陣咁美好,屋企人唔會永遠咁ENERGETIC咁後生,一切都會MOVE ON,無論你想唔想。

於是我突然諗–我係未係時候擺低對過去嘅眷戀,諗下點樣喺依家同將來,創造更多野–例如同屋企人嘅回憶呢?

然後,唔知點解,我就無再睇過TVB。

話說人會將情感associate落人事物都聽過唔少,但近呢幾年個人老咗真係覺得佢威力好大,同童年回憶有關嘅association,個效果仲係隨年歲增長添。對我嚟講,細個所有嘅開心同幸福,都好似轉移哂落睇TVB同食半生熟雞蛋咁,於是我終於明點解男朋友咁鍾意食某啲我覺得好難食,但佢由細食到大嘅嘢。

然後,我開始喺同男朋友一齊嘅時候,成日買嗰樣嘢比佢食,希望有一日佢會將呢種開心嘅感覺轉移哂落我身上。

 

 

作者:白告沂

白告沂
CHAOTIC系女子,熱愛自由雙子座Slasher,乜都寫。都係想有個地方暢所欲言,現實中是個毒L。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 216556
Date: 2021-07-04 05:38:58
Generated at: 2021-08-03 16:54:02
Permalink: https://www.vjmedia.com.hk/articles/2021/07/04/216556/我去到2021年先唔再睇tvb-正向聯想-positive-association