分手咪分手囉,三口六面講清楚好難咩?

 

 

有一日我喺IG Story問讀者:一句最令你印象深刻嘅說話。

我期望會有人分享甜蜜精彩嘅情節,點知收集返嚟嘅答案都係清一色嘅分手對話,部份更加賤到我搖晒頭:

「你快啲落咗佢,唔好阻住我同佢」

「無咗我,你咩都唔係」

「我唔玩你算執到啦,你今年貴庚呀?」

讀者開始分享佢地被分手嘅方式——突然消失、一句解釋原因都無、冷暴力一個月、喺社交平台宣布單身、明明自己偷食,仲可以公開老屈對方偷食。

令我眼界大開,沒有更賤,只有更賤。

雖然聽落好老土,但點解香港無愛情教育,教下男男女女點樣拍拖、相處、分手?

有人覺得社會自然會教識你。愛情教育就好似過往接受性教育咁,大家都係做樣上堂,教學嘅內容過時亦唔開放。

但如果人人都學得識分手,會唔會開心啲?

 

蔡格尼克效應——唔講清楚就分手是未完結事項

已妥善處理嘅一件事,以及一件未完結被打斷嘅事,我地會更傾向記得後者;即使事情已過去多時,我地腦海亦會不自覺會去思考解決嘅方法。念念不忘嘅遺憾好多時只係大腦嘅機制喺度作怪。

呢個講法係由心理學家蔡格尼克Bluma Zeigarnik嘅記憶實驗去證實。受試者會分為A、B兩組完成簡單任務,其中A組不被打擾,順利完成全部項目;而B組則會被不規律地打斷,導致最終無法完成任務。

兩組受試者會被邀請憶述剛才嘅任務。實驗統計顯示,B組平均可以回憶當中嘅68%,A組則只能回憶43%。

喺B組入面,受訪者第一個會即時想起嘅任務,回答「未完成任務項目」比回答「已完成任務項目」係多出5倍。

 

逃避分手面談,會令你帶來更多麻煩

我地對於一段關係總有可以幸福走下去嘅期望。

被冷暴力或沒理來嘅疏遠會令我地覺得事情未了結,過於執著於事情嘅細節,試圖搵出解決方案。

到底喺乜嘢時候關係出現咗變化?

係自己做錯咗引致對方累積已久嘅不滿?

係對方早已移情別戀?

而當各種胡思亂想到一個程度,我地就會忍唔住出手解決。亦即係大部份決定以消失做分手方式時最唔想出現嘅情況,偶斷絲連,情緒失控走去搵對方傾計,希望共識到唔分手嘅方法。

 

致夠膽表白,唔夠膽講分手嘅懦夫

奉勸打算分手嘅各位,如果想減少麻煩,唔好選擇消失或者冷暴力嘅方式去分手。

好好地與另一半傾談,可能係一次或者幾次,誠懇地解釋點解要同對方分手。

唔愛了、厭咗無Feel、有咗第二個、性格不合、覺得對方唔係結婚人選⋯真嘅就講出嚟,唔好隨便作一個理由,講什麼我配唔上你,你值得更好,想專注工作等等嘅狗屎理由去敷衍或者呃對方。

你唔同對方講死因,用家評分,人地喺下一段關係都唔知道可以點改善自己,避免缺點再次出現。

對方會寧願你講個真相佢知,現實難接受,但總好過一直念念不忘,左思右想。

先唔講你消失呢個仆街行為唔尊重愛你嘅另一半。

從分手角度諗,分得乾脆,先唔會麻煩到你。

 

www.instagram.com/fuctoria

 

作者:花小姐

花小姐
花小姐,連登甜故《一個書生既Player故事》、《一個普通女仔既大學故事》及愛情小說《只屬於我們的獨特戀愛關係》作者。喜歡發掘人性黑暗面。www.instagram.com/fuctoria

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 216597
Date: 2021-07-04 19:18:27
Generated at: 2021-08-03 18:18:02
Permalink: https://www.vjmedia.com.hk/articles/2021/07/04/216597/分手咪分手囉,三口六面講清楚好難咩?