寫於與舊單位分手之前——習慣化 (Habituation)

 

 

屋住得耐就會想搬,拖拍得耐就會想⋯⋯

下星期,我同男朋友就會從又細又偏僻嘅屋企,搬去面積大幾倍而且坐落市中心嘅新屋。

話說原本嗰間細屋係我屋企嘅單位,原本諗住當週末度假屋,同男朋友過去玩下。記得第一次去嗰日,我悉心打扮,睡衣底衫褲都精心揀過,約了男朋友喺單位樓下等。

單位好細,但要有嘅傢俬都有,對熱戀期嘅情侶好足夠。一齊過夜呢樣野,重點都係睇同邊個過嘅啫。單位入面無任何多餘嘅嘢,好空曠好乾淨好舒服,但棟大廈位置偏遠,樓下得間惠康、一間7仔、一間茶餐廳,一個得幾檔嘢嘅街市,仲有間麵包鋪,想買其他嘢要行好遠。

因為無乜Choice,嗰日我哋去附近嘅茶餐廳,買咗兩個三十二蚊嘅滑蛋牛肉飯做晚餐。喺熱戀期嘅人特別放縱,肥唔肥都唔怕,嗰日食完飯仲喺7仔買咗幾杯雪糕,嗰晚傾計傾通宵,一路傾一路食雪糕,凌晨4點仲食緊雀巢嘅士多啤梨雪糕杯。

第二日我哋兩日晏晝都有嘢做,起身好快咁食咗個八方,巴士仲有十五分鐘到站,於是我哋又去麵包鋪買咗個芒果糯米滋,坐喺一個除咗一個滑梯咩都無嘅公園入面食。

「可以住喺度就好啦,雖然遠啲,但我幾鍾意呢種feel,幾幽靜。同埋呢,我發現其實咁樣都已經好開心,食啲平野,咁樣坐喺度食已經好幸福。」我話。

「係呀,我都好鍾意呢度,可以同你一齊住就好。」佢一路講,一路伸出手幫我抹走嘴唇上嘅忌廉。

一個幾月後,我呀媽直接叫我哋搬過去住。

「反正都無人住㗎啦。」佢話。。

搬入去頭幾個月,我哋啱啱都辭咗職,決定一齊放吓假。每日一醒,都要望住對方個樣開心吓,覺得可以住埋一齊實在太幸福。然後狂睇Netflix又好、落樓食八方又好、去附近行吓又好–我都唔記得做咗咩,但每日都好開心。

咁就過咗一年。

一年後嘅我哋,做嘢忙到爆。唔好講放長假,每個星期可以約出去玩啲日子都係得番星期日。屋企愈嚟愈多嘢、愈嚟愈亂,再唔係我想去嗰間渡假屋。有時番屋企見到一堆雜物,我都有衝動想直接行番出去。

成日要出市區做嘢嘅我哋開始發現地理位置嘅重要性,放工好攰,仲要搭個幾鐘車先番到去。清幽呢?屋企對面嗰座山,我哋話過去行,結果一次都無行過。八方同間茶餐廳呢?除咗同居第一個月,我們幫襯次數不過十次。坐喺公園享受幽靜,都係得嗰一次,我哋放假唔係番喺屋企做廢人,就係走出市區玩。

我們決定搬屋,搬去更方便更大嘅單位。喺同舊單位分手前,我突然覺得不捨得。再唔捨得都好,都係要搬。

「你可唔可幫下手呀?搬屋啲野究竟你會唔會搞?」最近男友做嘢好忙,安排搬屋嘅工作都落到我身上,然後我開始燥底。

「吓⋯⋯我會呀。無話唔會呀。」佢一邊講,一邊用電話覆啲客WhatsApp。

呢刻我哋食緊八方。一齊耐咗,同居又見得多,一齊嘅時間自然唔會100%專注喺對方身上,至少食八方嗰陣唔會囉。呢個算係日常起居,唔算dating。我們有時會專登故去食得貴啲,Omakase、Fine Dining,都係想製造啲儀式感,至少吃呢啲嘅時候我哋唔會分心做其他嘢,大佬呀,餐飯咁貴⋯⋯

「喂,你望吓我得唔得呀。」我好嬲咁講。

「我有望呀。」他好敷衍咁答,講完先抬番起個頭望住我。

我望住佢,又諗番起熱戀期嘅幸福畫面。再熱戀的情侶,慢慢都會去到一個睇對方唔不順眼嘅階段。好似曾經嘅完美小單位,最後都唔再完美,又或者小單位從來都唔夠好,好嘅只係熱戀期⋯⋯

人類最大嘅弱點,或者係最大嘅優點,就係會習慣幸福。幾幸福嘅嘢慢慢都會變得平凡。無呢種天性,可能我哋唔會有機會搬大啲,或者人就係因為會習慣生活中嘅小確幸,先發明到「上進」呢個詞語。

值得慶幸嘅係,我們離開之後,個小單位會變到好似當初咁乾淨空曠,唔會有多餘嘅雜物,永遠keep住好似回憶中咁美好。

又或者過咗好耐之後,我哋再番嚟呢個細單位過一晚夜,又會有當初嘅幸福感覺,又會有閒情逸致坐喺樓下嘅公園,食住芒果糯米滋,睇十幾個細路排隊玩一個滑梯。

 

***

 

習慣化 (Habituation) 簡單嚟講就係講緊人對住一樣嘢耐咗會慣,無論你嘅感覺係開心定唔開心,好定唔好,都會慢慢淡。有啲人話解決方法係離開吓個人或者件事,遲啲番嚟就會有番個feel,啫係我第時再同男友番番細單位,可能又會覺得好正。至於熱戀期呢(苦笑),可以試吓用小別勝新婚,不過後續係男朋友有乖乖負責番好多嘢,最後仲做得多過我(我廢),所以唔需要用呢招,暫時生活愉快~

 

 

作者:白告沂

白告沂
CHAOTIC系女子,熱愛自由雙子座Slasher,乜都寫。都係想有個地方暢所欲言,現實中是個毒L。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 216659
Date: 2021-07-06 08:47:38
Generated at: 2021-08-04 15:35:21
Permalink: https://www.vjmedia.com.hk/articles/2021/07/06/216659/寫於與舊單位分手之前-習慣化-habituation