【外賣仔日記】公司指引話，客人遲少少都攞唔到外賣呀！

近來有個客我送咗兩次外賣俾佢，但係佢竟然神奇嘅係每次都爭啲攞唔到佢份外賣。

佢住緊嘅地方就冇得送上樓比佢嘅，每次都要打電話叫個客落樓攞外賣。

我記得第一次送俾佢嘅時候，打俾佢嗰陣，佢就咁啱出街Look 嘅樣啱啱返到屋企樓下，直頭響我面前接我電話，呢張單講緊係我已經響餐廳等咗一陣先有外賣，跟住送到過去佢屋企樓下佢就咁啱返到，第一次就覺得無咩特別嘅，但係第二次送外賣比佢就覺得佢真係會隨時食唔到份外賣。

第二次佢嗌咗嘅嘢食係餐廳非常快就可以搞掂，而餐廳距離佢屋企樓下唔係遠，我就好快已經到佢樓下，跟住就打比佢啦。

嘟～嘟嘟～～嘟嘟

佢：「喂？」

我：「你好呀，XX外賣公司呀，外賣到咗樓下，麻煩落嚟攞啦」

佢：「OK，而家嚟」

我就跟住響樓下等下佢啦

公司指引係打咗電話，系統就會自動開始倒數計時，夠鐘唔見人我哋就係可以離開，我哋撳掣離開前系統會問有冇地方可以安全放低食物，例如放低響你屋企門口，掛響門柄等等，如果有就將外賣放低安全地方離開啦，但係你個地址又唔比我上樓，我要響條街等你，咁我邊有安全地方放低呢？

假設放低響街邊地下，掉返轉衛生幫可能會告我亂抛垃圾添。

啲嘢食雖然冇人收，無安全地方放低係我哋自行處理，但係我哋真係未必下下食到，隨時垃圾桶見。

咁我開始等咗你好耐，倒數計時得返1 分鐘，佢仍然都係未出現，咁大部分嘅情況個客最終都係唔會出現架啦，但係到咗最後10 幾秒，有人穿著一個出街Look 嘅樣響佢屋企樓下問我嘢。

佢：「係咪XX 餐廳嘅外賣？」

我：「係呀，你好彩，仲有10 秒」

然後佢就攞咗份外賣就上咗樓啦。

每次送俾你，你都係啱啱好返到屋企樓下，每次你都係啱啱好返到褸下，如果有日我早咗到，你又唔係屋企，你就真係麻煩啦。

專題：【外賣仔日記】

作者：外賣仔

閱讀後覺得好，請多多讚好及分享～：）