【外賣仔日記】神秘外賣

接到張外賣送去一個寫字樓地址，嗰顧客係一個女性英文名嚟，絕對唔係啲中性嘅英文名嚟，男女都有人叫嗰啲，我哋就響呢度叫佢Mary 啦（為免有道德人士話我攞客啲資料嚟講，Mary 係我作嘅，唔係真實顧客姓名，OK？）。

顧客入送貨地址呢，就有個備註欄寫啲送貨備註比我哋嘅，例如寫低個地址邊度係入口之類，佢張單個備註欄就寫住話：

「千祈唔好話俾個收件人知，邊個嗌外賣比佢」

就咁嘅，香港所有外賣平台，如果你選擇網上付款你嘅外賣，都可以響落單嘅時候，俾埋tips 個外賣員嘅，但係你又一蚊tips 都無比喎，你個備註欄寫嘅嘢，我就盡量執行下啦。

去到送貨地址，即係寫字樓嘅樓下，然後嗰陣係非辦工時間，要打俾個客，叫佢響地下大堂攞外賣嘅，咁就打電話俾嗰客啦。

嘟～嘟嘟～～

佢：「喂？」（男人聲線嚟，而唔好忘記個客係寫住叫Mary ）

我：「你好呀，XX外賣公司到咗寫字樓樓下，麻煩落樓攞外賣」

佢（非常疑惑嘅聲線）：「OK」

然後佢就收咗線

明顯，呢張單有人想俾個驚喜人，但係我要打俾佢攞外賣喎，兼冇任何嘢可以話俾收件人知個外賣係佢（個顧客姓名寫你Mary 個大名架），咁個驚喜仲響唔響度？

之後有個男人落樓話攞外賣，面上帶著非常疑惑嘅面孔，我就俾咗份外賣佢啦，由於佢一直都非常疑惑，之後我將個系統上面顯示嘅人名，連埋嗰個備註欄俾個男人睇，佢個樣好似即時變咗我明白了嘅樣，明顯佢係識得阿Mary 。

親愛嘅Mary 小姐，你連張單都寫你Mary 個大名，個送貨地址我又唔係放低外賣就走得，放低走得起碼唔會有機會同收件人交流啊，你可以繼續你嘅驚喜，但搞到收件人咁疑惑，你又一蚊tips 都無比我，好似我份人工唔包括講任何其他無關送貨嘅嘢架呵？你有俾tips 我起碼都會諗下計隱藏你個名啊，你一蚊tips 都無比要我浪費無謂嘅口水？所以，哈哈哈哈哈哈哈哈。

專題：【外賣仔日記】

作者：外賣仔

閱讀後覺得好，請多多讚好及分享～：）