跟鬼佬做嘢原來都幾好

以前我係好抗拒做外資公司，主要係覺得自己英文屎，驚溝通唔到然後做錯晒啲嘢，同埋文化唔同，唔知佢哋會唔會成日要飲酒應酬，但係由於之前一直都搵唔到工，所以就開始濫發履歷表，然後有日就收到電話約我去CAFE度見工，HR話老闆係鬼佬，想casual啲，本身都淆晒底，好彩出奇地同老闆Albert幾啱傾，大概都聽得明七、八成，之後再視像見埋佢外國嘅拍檔，過多一兩日就收到offer。

唔知係咪外資公司嘅關係，人工同福利都好啲，淨係大假數量已經係我上一份工嘅雙倍，咁大個女都無試過有咁多假，仲要合約寫明有雙糧，真係令我受寵若驚。不過針無兩頭利，點會我著數晒呢？所以工作量都係成正比，我嘅部門暫時得我一隻開荒牛，好多嘢我都唔係好識，無接觸過，唯有不斷上網自學同研究，因為無人會得閒教，雖然辛苦，但我終於有新嘢學，有動力，唔使再好似以前咁頹廢，日日做啲明知無用嘅嘢！

呢度嘅budget多好多，一年嘅預算已經定好晒，有需要可以再調整，想做啲咩可以提出，再畀老闆批，之前喺舊公司每次我問腦細budget係幾多，佢都係叫我plan晒先，諗完一大堆，佢都係叫我做咗啲唔使錢嘅嘢先，marketing係使錢嘅部門，無錢真係做唔到啲乜，成效好有限，然後就會畀腦細捽點解會無成效，大佬呀你都無畀錢。

Albert話唔希望我做個yes man，如果佢有咩idea唔好一定要出聲，我都見過好多同事同佢拗到面紅耳赤，但大家都係為件事好，傾完又可以變返嘻嘻哈哈，唔驚畀人抽後算帳，個個都夠膽發表自己意見。換轉係以前？問多兩句或許稍微有少少質疑，腦細已經黑晒面，就算佢表面上問你有咩意見，其實都唔係真心，只係想得到你嘅附和，覺得佢講嘅永遠是對的，最好拍埋手大叫：「腦細英明！」。

Albert比較著重結果，過程係點，用咩方法做佢係唔太理會，佢會畀意見，但唔使一定要跟佢果套，自由度大好多。工作時間同地點都比較彈性，因為佢話有電腦就做到嘢㗎啦，最好係佢唔會懷疑我work from home係偷懶，有緊要嘢先會搵我，有時我返咗公司，下晝佢去開港島開會，都會話車埋我走，變相早咗幾個鐘收工。但以前腦細喺我wfh係會keep住搵我，睇吓我係咪即刻應機，或者特登畀啲濕碎嘢我做。佢只係希望同事加班，你愈夜走佢愈開心，你準時走佢都覺得蝕㗎，最興就係喺你走果陣問：「你今日咁早走嘅？」

呢度唯一唔好係黑雨都要返工，Albert話覺得香港人好有趣，落雨就唔使返工，佢唔明有咩好驚，雨都係水嚟咋嘛，我個人就覺得香港啲黑雨真係唔講得笑，水浸啦、山泥傾瀉啦，天雨路滑易有意外啦，果日黑雨我去到地鐵站已經有成堆打工仔企晒喺度等，鬼叫天文台咁遲先掛黑雨，個個都出晒門口，同埋落咗黑雨又要兩個鐘內返到公司，到時一定大塞車，所以有啲人都會照出去，為咗返工，香港人可以去到幾盡？

當然啦，我而家覺得呢度樣樣都好，某程度上都係因為返新工嘅蜜月期仲未過啫，遲啲就真正知咩料喇，待續…

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）