一生只想找一個肯幫我剪白頭髮的男人

 

「你可唔可以幫我剪咗啲白頭髮?」我說。
「梗係可以啦!」男朋友阿奇說。
「你剪面頭睇到果啲就得㗎喇。」我說,心諗如果要剪埋底果層,應該有排剪,我估都有幾十條。
「你個底有好多喎,點解會咁㗎?好慘呀我女朋友。」阿奇邊掀起頭髮邊說。
「其實不嬲都有好多,不過喺底層唔覺眼。」我說,壞心眼嘅女人就係想佢早啲認清楚面前呢個女人其實真係老過佢呢個事實。
「放心啦,唔緊要㗎,我都一樣咁鍾意你㗎嘻嘻。」阿奇說。

以前年少無知,覺得搵一個肯幫自己吹頭嘅男人就係幸福,因為以前我真係好怕吹頭,特別係要加班,凌晨先返到屋企嘅時候,吹勁耐都唔乾,吹到出晒汗,大佬啱啱先沖完涼咋,但係唔吹又唔得喎,如果個頭未乾就瞓會好易頭痛,但係而家就唔會再咁諗,首先我已經唔會再做一啲要成日加班嘅工,好後悔果陣捱壞咗身體,其次就係開住冷氣/風扇吹咪解決倒囉,好小事啫。

相反,白頭髮就真係難搞好多,唔係自己想剪就剪到,因為真係好唔就手,你要㩒住側邊啲黑頭髮,唔係好易會一齊剪埋,剪白頭髮果陣又要剪得好貼,唔係好快又會隊出嚟,你當然可以染黑佢啦,但係我又唔想,我鍾意自然嘅黑色,雖然遲早都有一日要染,有啲人會掹白頭髮,但我又怕痛,所以平時都係呀媽幫我剪。

然後有日我突然諗,呀媽係唔會陪到我一世,佢唔可以幫我剪白頭髮剪一世,佢終有一日會離開,即使我幾唔想都好,唔知你哋有無試過,人大咗之後久唔久就會諗起父母,發現佢哋老咗好多,好驚佢哋有事,然後一諗到佢哋有日會離開自己就眼濕濕,而代替佢哋陪你一路走落去嘅人,好可能就係你嘅另一半。

剪白頭髮,睇落係一個好簡單嘅任務,但其實好需要耐性,而且唔係剪一次就得,可能兩個月就要剪一次,蜜月期就話覺得好sweet啫,一年後呢?五年後呢?十年後呢?會唔會已經由sweet變咗好麻煩?「一世」係好長嘅時間,同「永遠」差唔多,其實我一直都好怕呢啲詞語,或者承諾,因為無人可以保證到,所以珍惜而家開心幸福嘅日子已經好足夠。

 

P.S. 我記得有個ex同阿奇同年,見到我有幾條白頭髮就即刻同我講:「嘩!白髮魔女呀!」我即刻反咗白眼,有時成唔成熟,真係唔關年紀事。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 217005
Date: 2021-07-27 07:51:39
Generated at: 2021-09-28 13:39:55
Permalink: https://www.vjmedia.com.hk/articles/2021/07/27/217005/一生只想找一個肯幫我剪白頭髮的男人