獎牌榜點排，都係政治

我覺得奧運最大嘅貢獻，除咗畀大家睇到她精采嘅比賽之外，就係畀嗰啲開口埋口「體育歸體育，政治歸政治」嘅契弟睇到，體育同政治根本密不可分，緊密到要犧牲運動員都在所不惜。唔講其他，剩係個獎牌榜都大把嘢。

奧運開始冇耐，已經有中國傳媒炮轟好似法國《隊報》呢啲大嘅國外傳媒，話佢哋喺獎牌榜列中華台北做台灣，而中國香港又剩係寫香港，唔尊重一中原則，當然又係辱華，又係傷害中國人民感情blablabla下刪一萬字，呢啲都見怪不怪。

但到咗近呢幾日，中國金牌數明顯拋離美國，排喺獎牌榜第一，不過美國幾個大傳媒好似《紐約時報》、《華盛頓郵報》，轉播奧運嘅NBC，同埋美國奧委會都以獎牌總數計算，所以美國繼續第一，當然就惹嚟爭議喇。截至8月4日，美國一共79面獎牌，遠勝中國嘅70面，但中國嘅金牌已經有32面，又稍稍拋離美國嘅25面。以國際奧委會嘅準則，一向都係用金牌數做衡量排名標準，但點解去到唔同地方又會變咗唔同準則？

老老實實，獎牌榜用咩做排名標準都一定有人睇唔過眼。好似舊蘋果體育人開搞嘅《體壹》每晚都會做獎牌榜，呢期日日都係中國排第一，所以啲網民都有少少頂唔順，有人留言「可以用獎牌數做sort」，甚至有人直接鬧「係咪唔識分金牌榜同獎牌榜？」呢啲人唔會見到其實日本獎牌數都少過英國，只不過金牌多過英國先排第3。又唔會睇到16年里約奧運中國總獎牌其實多過英國（70對67），不過英國就因為一面金牌優勢（27對26）成為獎牌榜第2。所有嘢都係因為咁嘅政治氣氛迫成，冇話啱定錯，我哋都要睇住政治淩駕晒生活上嘅所有嘢。

作者：阿享

一個戒緊牛肉，但打邊爐仍然會忍唔住既耶青。

閱讀後覺得好，請多多讚好及分享～：）