做嘢最難就係點樣令所有人都開心

 

有啲工種係可以自己埋頭苦幹,唔使點同人溝通,但做Marketing一定唔得,喺公司你要同老闆、上司溝通,佢哋大粒過你,唔得罪得就梗㗎喇,但係唔同部門嘅人,例如設計、營運、銷售同會計,就算同你同級或者低級過你,都要同佢地好好相處,因為工作上成日都要合作,是但一條友玩嘢都會好麻煩,而對外就有唔同嘅contractor、例如PR公司、裝修公司,仲有夾joint promotion嘅公司等等,基本上每日都要同唔同人打交道。

做外資公司,諗住「山高皇帝遠」就管你唔到?咁就太天真喇,就算總公司喺外國,果邊嘅經理一樣可以日日打畀你,同你視象開會,加上無數嘅 email同whatsapp,其實都係會忙到嘔泡,仲有好多deadline要趕,而同一時間香港嘅老闆又會畀嘢我做,最慘係咩?就係佢哋兩個嘅意見永遠都係相反,但唔會直接對話,只會同我呢個中間人講,而我要令到佢地兩個都滿意,就係最難嘅任務。

「我想喺呢度加個有香港特式啲嘅招牌。」香港老闆Albert說。
「我唔要呢度有招牌,要統一。」外國經理Ben說。
「唔好意思呀Albert,阿Ben話呢度唔可以加招牌,因為想香港店同總公司統一返。」我傳話說。
「香港要有香港嘅特色呀!加返落去,唔使理佢,你照整。」Albert說。
「唔好意思呀Ben,我老闆都係想留返個招牌,想有返啲香港嘅特式。」我傳話說。
「我都話要統一,要跟總公司,你同佢講啦!」Ben說。

無論大小事都係咁樣無限loop,由於佢哋兩個都咁高咁大,唔得罪得,喺佢哋之間周旋就係我返工最攰嘅事,有時傳話都好危險,好易焫著是但一邊,大佬呀我淨係想做好我份工,其實我正正經經做嘢已經好忙唔得閒理你哋,可唔可以唔好嘥我時間同畀啲無形壓力我呀?

除咗高層,其實有啲低級/中級職員(老屎忽)都會恃住自己做得耐,喺度蝦蝦霸霸恰新人,推啲無謂野你做,雖然我都主張和平相處,但係太平易近人佢哋就會得吋進尺,所以有時無可避免都要強硬返,同佢死過。

其實做嘢又邊有可能令所有人都開心?亦唔需要咁做,因為就算做到,你自己都一定會唔開心,因為令人開心,間接就係委屈自己,而做嘢唔開心,每日唉聲嘆氣,份工都做唔會做得長。每份工都有好同壞嘅地方,有時受咗氣或者有錯折,咪諗吓好果面囉,講真呢度都算人工高福利好,仲有好多嘢學,多數都準時收工,唔錯㗎喇,呻完咪又係一條好漢,食餐好嘅,,聽日繼續準時返工,鬼叫你窮呀頂硬上啦!(呢句嘢好似會出賣年齡XD)

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 217823
Date: 2021-08-14 21:56:10
Generated at: 2021-09-29 04:05:24
Permalink: https://www.vjmedia.com.hk/articles/2021/08/14/217823/做嘢最難就係點樣令所有人都開心