姊弟戀又如何？

「Happy Friday不如同我朋友一齊食餐飯，佢都會帶埋佢女友。」男朋友阿奇說。
「好呀，幾時呀？第一次見你啲朋友有啲緊張添。」我說。
「過多兩個星期吖，佢女友到時就開始放假。」阿奇說。
「放假？拎annual呀？」我傻更更地說。
「Er…唔係呀，佢女友仲讀緊書，放暑假。」阿奇尷尬地說。
「WHAT THE…？仲讀緊書！？即係幾多歲？」我驚訝地說，心諗呀姐我已經做咗好多年嘢。
「Er….um…細你十年，不過唔緊要㗎，你個樣咁細個，唔覺㗎！」阿奇說。
「……………………………….」

本身我已經大阿奇幾年，而佢嘅朋友同佢差唔多大，所以佢哋嘅女朋友再細個啲都係好正常，但我真係無諗過會差十年咁多，即刻淆晒底，然後同啲姊妹求救，佢地竟然叫我快啲上連登睇吓而家啲後生仔女傾開咩話題，咩潮語，廢事有代溝，或者聽唔明唔識笑，衣著呢就千其唔好著得太後生又唔好太成熟，斯斯文文嘅連身裙或長裙就可以喇，切忌暴露，化個自然淡妝，前幾日敷多兩塊mask，早啲瞓，做返自己就得，好彩最後我都順利渡過果餐晚飯。

「男人遲熟，思想幼稚啲，搵個年紀大啲好喎，佢咁細個照唔照顧到你㗎？」
「女人老得快過男人㗎！遲啲佢就會追求青春肉體唔要你。」
「佢仲咁細個，有排先諗結婚，但係你呢？三張幾喇喎，點等呀？」
「你咁老人地屋企會唔會唔鍾意㗎？年紀大難生仔喎！」

無論係姊弟戀又好，忘年戀又好，正常戀又好，乜戀都好，都總會有人畀說話你聽，香港人都係鍾意睇人仆街，對付呢啲人，最重要係意志堅定，唔使將啲無謂說話放喺心，而家你拍拖定佢拍拖，關佢叉事咩？同埋你可以留意吓，通常講呢啲嘅人自己嘅感情狀況都唔太美滿，佢先會咁得閒對你指指點點。年紀從來都唔係唯一嘅指標去睇一個人，雖然阿奇係細過我，但我覺得佢照顧得我好好，而且拍拖係互相照顧，唔係只有take而無give。成熟男人vs小鮮肉；後生女vs中女，各有各好，爭咩啫。

「我個fd話你睇落仲細過我，都唔似姐姐。」阿奇說。
「哈哈，咁佢地有無問過你我幾多歲？」我說。
「無喎，如果問講唔講得㗎？」阿奇說。
「講得呀，我無所謂啦，唔使刻意隱瞞。」我說。

無論幾多歲嘅女人，都要對自己有自信，愛自己，總有一日會遇到識欣賞你嘅人。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）