雞公嶺睇日落,畏高都啱行😅

 

呢個禮拜時晴時雨,禮拜日睇睇窗外藍天,就發貼:「唔信邪︰今日下午去雞公嶺,睇日落!」諗住Solo都照出,點知有四位朋友響應,遂約定三點半上水火車站集合。

四個人交通最方便:搭的士除四價錢同巴士差唔多,一陣風就到咗村口(巴士站︰橋頭),盛惠四十幾蚊,真抵。

樹獺由元朗搭巴士過嚟,一行五人準時四點起步。樹獺與楊兄多次登山,有佢哋帶路,放心。一進村,村民嘅狗即狂吠不止,好在狗狗喺鐵絲網後面,我地急急腳上右邊嘅樓梯,轉個彎就見到山口,有好多絲帶,唔會認錯。

經過一個月不穩定天氣,YY、奧菲同我都無上山一段時間,開頭一口氣撐咗幾百級樓梯,去到一個稍為開揚嘅山頭,大家都爆晒汗、腳都軟,就停低休息回回氣。山下蕉徑谷地有翠綠山村,遠處粉嶺上水以至深圳嘅高樓大廈,奧菲已開始咔咔聲影相,我見前面高處仲有大把機會,就只係隨意影幾張。

開頭上山路段係幾急嘅泥路斜坡,過去一個禮拜落咗幾多雨,理應泥濘不堪。但禮拜六下晝至今日出咗太陽,剛啱曬乾嘅泥濘反而結實易行。再曬多幾日,就會變浮沙碎石,又難行咗。雞公嶺一座草山,無樹,暴曬係必然嘅,所以我哋四點幾太陽無咁猛烈先上山,另外,我哋嚟睇日落架嘛。

過咗兩個小丘頂,一片黑雲飄至,跟住雨點就一大串一大串咁打落嚟,係見得到嘅一串串雨點。我哋帶咗遮,就喺山坡停低「避雨」。我就即刻上天文台睇有無雷暴,雞公嶺無遮無掩,企喺山脊易遭雷擊,雷暴必須下山撤退。其次睇雷達圖,評估未來雨勢大小同持續時間。天文台無雷暴警告,雷達顯示舊雲唔大唔厚,再睇睇大刀屻嗰邊陽光普照,判斷只係過雲雨,就地等咗十幾分鐘,雨勢轉弱就即刻開步,畢竟我哋要追趕六點半左右嘅日落。

歌都有得唱「雨過後有彩虹」,大家上多一段路,就見到一道厚厚嘅彩虹影照喺大刀屻嘅山體之上,七色清晰可辨。

 

嘩嘩嘩,彩虹呀!

 

大家又恥笑本地切割大學嘅祭酒,指Green為「青」,謂其新搞作Green logo係「青出於藍」云云。查實「青」係Blue,「藍」係草字頭,係一種植物,「青出於藍」係由植物提煉出「青色」,「青」係我哋抬頭望見嘅「青天」,俗謂天藍色是也。青天白日滿地紅旗人人識認,幾時有「綠色」?反而日語漢字好準確,「あお」就係「青」,就係「Blue」。

大家狂影一輪彩虹之後,繼續上山,YY問幾時到,楊兄就指前面嘅山頂「就係嗰度」,我都信埋一分,點知到達「山頂」,面前就出現兩個更高嘅山頂,睇睇里程,真係仲有一公里左右先至到羅天頂。宜家已經係五點左右,太陽更溫柔,山脊仲有啲風,體感頗為舒服。我哋一路向西,太陽斜照開始刺眼,反而要開遮擋陽⋯⋯

 

龍潭山頂都係「頂」,前面先至係羅天頂。

 

行吓行吓,就到咗雞公嶺嘅主峰羅天頂,標高585米,但無「標」可KILL。需知道,「標」係測量用嘅「三角網測站」,羅天頂嘅位置唔太好,周圍都有山頭,遮住底下平原嘅視線,所以支「標」豎咗喺前些少嘅大羅天。我地喺羅天頂睇咗陣風景,就去前邊KILL標。

去到大羅天支標,高度572米,真係極目四望嘅好位。今日落雨無咩人上山,我地包場!陽光斜照米埔、南生圍嘅漁塘,深圳嘅天際線,遠望自東而西嘅群山。空氣中灰塵已被洗濯,視野廣闊。北大刀屻背後見到馬鞍山,大帽山西脈盡頭、隔了海,見到大東山、鳳凰山、彌勒山,再東面青山尖端上嘅發射站,最易認,圓頭山真係圓,可惜係山頂嗰幾棵大樹經歷數次火刧都無事,卻喺年頭俾人砍倒消失,可恨可恨。

 

整完呢張相,改寫咗首詩玩玩

〈登雞公嶺〉
西上大羅天,夕陽窮登攀。
群峰與我語,笑談風雲翻。
昂首望青天,坐看天地間。
別過晚霞去,山友樂返還。

 

六點鐘,太陽仲喺舊厚雲後面,但係欣賞過嘅風景已經令隊友們大呼值回票價。會唔會見到一隻咸蛋黃呢?我問。無論如何,我地唔能夠喺呢個最高點等,為減少入黑後嘅路程,就要繼續前進。

一陣間就落到圭角石,有踏腳位可以攀上大石頭上面,我畏高,留喺後面山脊上面,等待隊友爬上大石,收獲幾張背光剪影。

 

山下面嘅朋友,你哋好嗎?(設計對白)

 

六點半,咸蛋黃

 

晚霞倒影喺新田同米埔嘅魚塘上面,深圳嘅城市燈光開始堆砌出一條天際線

 

雲比較厚,只係得少少咸蛋黃,但係睇到佢圓圓嘅。MAGIC MOMENT只不過幾分鐘,值得我哋留喺山脊上面慢慢欣賞。我用平價電話影相記錄唔到呢個360度嘅良辰美景,文字就更加唔知用幾多字去形容,親歷其境,珍惜呢一刻。

睇完風景就落山,先要上番少少,路過雞公山,又有標KILL。天雖黑,但城市(錦田、元朗、深圳)三面嘅燈光幾夠照,唔用頭燈都睇得到路(我哋預咗夜行已帶備頭燈,「有得用唔用」同「無得用」有好大分別!)。逢吉鄉呢邊好似比較斜,但修咗簡易梯級,踏住木板一級級咁落,小心啲,集中精神,大約45分鐘就落到車路,八點搭小巴出元朗食飯醫肚。

 

全程7.3公里,上山577米,加埋停低睇風景同休息嘅時間用咗4個鐘。

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 218897
Date: 2021-09-07 20:48:51
Generated at: 2021-09-29 00:55:41
Permalink: https://www.vjmedia.com.hk/articles/2021/09/07/218897/雞公嶺睇日落,畏高都啱行😅