其實唔係後生就有quota 去捱…

 

 

「喂,你平時已經要返正職,放工仲去送food panda,放假又返兼職sales,捱唔捱得住㗎?」我說。
「無計啦,唔搵多啲錢點養家,仲要拍拖呢?」朋友Ryan說。
「食平啲囉,買少啲嘢囉,咁搞法實捱壞,你第時就會後悔。」我說。
「邊有咁易吖,後生都唔捱唔通等老先嚟捱咩?」Ryan說。

我畢業之後第一份工就係做marketing agency,果陣入世未深,覺得自己無工作經驗都有人請已經好好彩,所以成日加班到凌晨都無怨言繼續做,有時返工太忙我會連水都唔記得飲,lunch又唔記得食,甚至廁所都唔記得去,成日肩頸膊痛,有次去按摩,個泰國師傅都話睇我個樣就廿幾歲,一按落去就似四五十歲,啲筋痴住晒又腫脹,問我平時係咪返地盤擔泥,但果陣仲後生,每次按完就無事,所以我都無理,瞓醒一覺又再拼搏。

後來轉咗工做in-house marketing,終於唔使再成日加班,但做咗兩年幾之後又開始胃痛,睇晒中西醫、專科,食咗好多藥都無用,當時仲要戒口,好多嘢都唔食得,就算食都要咬碎啲同食慢啲,連食好嘢嘅一大樂趣都無埋,搞咗好耐都搵唔到確實原因,然後醫生就話係壓力問題,我仲懷疑過自己有焦慮症,因為除咗胃痛,我有時仲會腰痛、肚痛,總之周身骨痛,後嚟我辭咗職,休息咗幾個月就好返好多,但係自從呢次之後就好容易胃痛。

我媽成日都話係我第一份工嘅時候捱壞咗,我初初都唔信,仲係咁同佢講我果陣都無乜事!但佢就話捱壞咗唔係即時感覺倒,之後你就知㗎喇,所以我而家都唔敢再搵啲咁辛苦嘅工,但係試問香港邊有工係唔辛苦?所以只可以靠自己去調節,不斷提醒自己唔好咁搏,打份工㗎咋,同埋學識慢活,好似隻樹懶咁,行路、食嘢都要慢啲,放鬆心情,做吓瑜伽同簡單運動,總括嚟講就係要養身。

年紀大咗,工作上或者朋友圈中就開始出現比較後生嘅一群,次次見到佢地做嘢做到好夜完全唔夠休息,或者係成日玩通頂,我就會有衝動好想叫佢地「唔好呀,你會後悔㗎!」但係佢地當然唔會聽啦,分分鐘仲覺得你好老餅,就等如我果陣唔聽呀媽講一樣。有啲人覺得襯後生去捱吓,搵多啲錢,老咗咪唔使捱囉,但係「捱」係有quota,而你永遠都唔知啲quota幾時會用完,身體捱壞咗就幾多錢都補唔返,所以無論幾多歲都好,真係要對自己好啲,身心都係。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 219007
Date: 2021-09-19 07:12:46
Generated at: 2021-10-21 16:39:52
Permalink: https://www.vjmedia.com.hk/articles/2021/09/19/219007/其實唔係後生就有quota-去捱