漫行古道越獅山

禮拜六朝早練跑,教練話烈日高溫跑步,鍛鍊心肺功能事半功倍,好似話跑1公里等如在陰涼天跑1。5公里咁。由九點到十一點,城門河畔跑吓行吓叫練咗14公里。

禮拜日係應該休息嘅,業餘做運動呢,過尤不及,練太多反而會受傷同過勞,無益不特止,反而有害。但由早上到下晝都坐喺屋企,工作、上網、睇電視,四點左右諗不如出去行吓樓梯,輕輕鬆鬆舒展下。唔跑唔急,喺山度吸吓清新空氣幾好吖。

SOLO最好嘅地方就係唔使搵人,想去就去,充實水袋,帶上電池、哨子,換衫就可以出門口。幾個站地鐵就到咗樂富,一出地鐵,做咩咁多差人周圍走?唔好八卦,自己行過就好。

去到獅子山公園,搵個位見到獅頭影張自拍出發相,連同路線圖,SEND俾屋企同朋友。SOLO都要顧安全,一張有地標嘅出發相間接留低咗︰時間、地點同人物(著咩衫、戴咩帽、背囊咩樣)嘅資料,路線圖話俾人知將來嘅位置。你無準時落山,屋企同朋友搵人嚟救你都要有線索先得架嘛。

獅子山……影得好求其……

 

今日有落雨,天文台又雷暴警告,時間亦比較晏,就揀咗行大路獅紅古道上山,全段都鋪得整整齊齊,路口有齊路牌,唔會行錯路。今年春天年頭曾經行過同一段路,用咗差唔多一個鐘,休息幾次先至上得去。今次呢,30分鐘左右就輕鬆由獅子山公園上到九龍坳涼亭,1公里路上咗200米,好多樓梯,但係調整好呼吸,時快時慢咁撐上去,感覺到係層次嘅唔同,氣同力都係大大嘅進步,有教練嘅系統同指導,由唔識到識啲啲,屬質嘅進步。

路況記錄,唔算好急嘅樓梯係咁上。落雨要特別小心呢類石板路,跣到HIHI架。

 

有個開陽位,睇住九龍東同土瓜灣落緊雨,呢邊天氣唔錯,諗緊上埋獅子頭。

 

去到九龍坳涼亭,都幾多人喺度休息。感覺有微微雨,又有雷暴警告……又有啲懶,咁就決定唔上獅頭(SOLO就係自己話晒事唔使理其他人)。九龍坳呢個位係多條路徑嘅交匯,左右係麥理浩徑第五段,向九龍有我嘅來路,右邊仲有一條平行嘅八仙徑都係落番獅子山公園。向沙田可以續行獅紅古道,會經過望夫石出大圍。我就計劃咗經乾隆古道落衛徑引水道,無咩嘢就唔改路線,上網報告一下位置,單聲唔上獅頭就落山。

乾隆古道路況……我會叫呢啲明顯係有管理修繕嘅山路做「大路」。

 

乾隆古道,開頭係山路,之後係石頭路,林蔭度100%。坡度比較平坦,好好行,空氣極好,每一下深呼吸都係清潔緊個肺。至於點解叫乾隆古道?GOOGLE一下,有人話係「乾隆年」有嘅路,咪叫乾隆古道囉,有啲想當然嘅況味。

查考地圖,獅子山南北兩邊,北邊沙田嘅路,由西向東係︰貴妃徑、乾隆古道、獅紅古道、三叉徑、大龍徑、小龍徑、衛徑第五段、慈沙古道、割草坳古道、觀平路(馬路)。行山脊嘅有︰雞胸山北脊、水泉澳山脊。獅山山脊線上嘅坳口有︰鐵路坳、九龍坳、加特坳、沙田坳同吊草岩。南向嘅路有八仙徑、獅紅古道、沙田坳道(馬路)、觀音佛堂路、慈觀古道,加埋扎山道上山,都有排玩喎。

一陣間就落到引水道。平路就跑番一兩百米,無咩勁度,無咩動力去跑,都係輕輕鬆鬆行吓算。根據地圖轉右落樓梯(呢個路口竟無路牌),有個開陽位影番張相。落去過咗配水庫就有車路,分叉會去到獅隧出口,望吓,影張相,再落一段,見到沙田濾水廠好大工程,水務呢啲真正民生工程,惠民數十年卻無咩人會記得。現在大家去水塘行山,見到18幾幾年、19幾幾年嘅水壩、引水道,賞玩古蹟同湖光山色好開心。但係呢啲古董嘅意義唔係嚟俾大家玩嘅,佢地集水供水一百幾十年,我地開水喉就有水,固然係天降甘霖,亦係呢啲古董嘅功效。呢啲工程服務潤物無聲,無咗就好很大鑊,要多啲教俾小朋友知道,亦要多謝一班將呢啲設施維護使用得好好嘅公僕。

轉個彎就到咗顯徑村,在馬鐵站外影張到此一遊。繼續去大圍,路邊有兒童遊樂場,好多笑聲,點知未行過個公園就落起大雨,啲小朋友大朋友都急急走人。望望天,估呢場雨幾大同幾耐,無謂雨中趕路,6公里都收貨先,就掉頭搭鐵走人。今日全程用咗1小時22分鐘,上咗351米,比想像中快咗好多。

呢段路應該係晨運路,山邊有涼亭、路邊有長櫈。

 

有條分叉路可以通往獅子山隧道嘅出口,平時搭車經過呢個彎位無數次,第一次行到埋去。

 

原來沙田濾水廠咁大工程

 

顯徑站門口

 

樂富一獅紅古道一乾隆古道一衛徑五一顯徑邨

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 「媽劇停」之苦 by 小盛女
    最緊忙緊咩?忙緊請人,你無睇錯,我終於可以請人喇!唔使再一個人頂晒所有嘢,好感動!起初我滿心歡喜,以為會有好多CV send過嚟,點知原來10份都無,仲要有幾份係印度人,我唔係歧視佢地,只係唔識中文真係搞唔掂,好難勝任「媽劇停」嘅工作。…
  • 《彼岸島》絕對是我人生中看的其中一套最令我無言的漫畫。 by 鵝鑾鼻燈塔
    如果你沒有看過,恭喜你,你的人生是完全沒有任何損失的。這種比狗血更狗血的劇情,永無休止又不斷無限loop的橋段,看了也想把自己雙眼也插盲。簡單來說,主角不論做了甚麼,也無法打死早已不死的吸血鬼之王,只能眼看自己的同伴一個又一個的死去(有時甚…
  • 小王子與狐狸 by 肝醣爆裂
    電影版小王子和原著風格甚遠,不合我胃口。小王子原著是大人也讀得懂的童書,電影版是真的給小孩子看的。電影中有一半 […]…
  • 琴日我第1次約PTGF,有感而發(利申23歲男) by losing her was blue
    話說前日放假,無聊係IG到禁下ptgf呢樣野睇下。我就咁睇,行個街,睇場戲,全部都收人幾百蚊個鐘。但我見到個tag有成4萬幾個post。係個刻,我就知道,原來真係有人會幫襯。係到我想講句,多謝哂你班仆街毒撚/9公係到成日頂爛市,做壞規矩,寵…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
歡迎讚好我們的facebook page,免費資訊源源送上。

文章資訊

ID: 219019
Date: 2021-09-21 15:45:40
Generated at: 2022-07-03 01:57:22
Permalink: https://www.vjmedia.com.hk/articles/2021/09/21/219019/漫行古道越獅山