Review 嘅意義係咩?加人工囉!

 

 

「恭喜你過咗試用期,你做得好好,我所有嘢都好滿意。」老闆Albert說。
「多謝,我會繼續努力。」我說。
「經理琴日應該都同你做咗review,佢有同我講覺得你做得幾好。」Albert說。
「多謝,既然你同經理都滿意我嘅表現,我想問人工有無機會調整?因為簽合約嘅時候係壓咗價,你話過試用期再按我嘅表現去review…」我大膽地問。
「我返去check check啲文件再覆你。」Albert說,然後轉身就走。

過試用期要review,做夠一年又要review,話就話可以令員工檢討自己過去一年做成點,管理層亦可以借呢個機會去評價員工,話佢哋聽邊度做得好,邊度要改善,但喺我角度,review嘅意義就係加人工!如果你唔加我入工,你讚到我天上有地下無,咩公司無咗你唔得,靠你一個撐起成條team呢啲全L部都係bull shit!我唔係要你讚,我係要錢,返工就係為咗搵錢!

我當然明白返工唔單只係為搵錢,特別係初初出嚟做嘢果陣,返工可以係為學野、增長知識、提升技能,識到班好同事等等,但有返咁上下年資之後,你就知道返工唔係去學嘢,公司係要你一返工就上手,幫公司搵生意賺錢,你想學嘢唔該自己比錢出去上堂,所以講到尾,返工最主要都係為錢,無錢嘅工有無人會做?我唔信會有,就算有果種都係叫義工。

「個review大致上做完㗎喇,你仲有無咩問題?」身處外國嘅經理Ben問。
「我想問人工調整係咪要問返老闆Albert?」我說。
「係呀,佢都有同我提起過呢件事,佢話要返去check check啲文件先。」Ben說。
「但係佢果陣口講,口約無寫,無文件比佢check…」我說。
「噢,咁你下次要小心啲喇,最好都係白紙黑字寫明啦,穩陣啲。」Ben說。

加定唔加?呢個係一個謎,可能突然聽日就同我話加人工,又或者等到我做夠一年嘅時候都仲係話check緊文件,其實加同唔加我都會繼續做,我都係想得個知字啫,加一個字,唔加兩個字,真係咁難咩?難到我篇文都寫好咗放咗喺度成個星期都收唔到尾,我自問已經做到最好,唯一反省嘅位就係點解當初唔白紙黑字寫清楚,只怪自己當時唔夠堅定,今次就當買個教訓。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 219171
Date: 2021-10-08 07:35:57
Generated at: 2021-10-21 09:43:34
Permalink: https://www.vjmedia.com.hk/articles/2021/10/08/219171/review-嘅意義係咩?加人工囉!