男女都要返工，點解淨係女人要做家務？

話說我成日都肩頸痛，所以久唔久就會去按摩鬆吓，唔同師傅嘅手勢同力度都唔同，今日呢個師傅嬌姐暫時係我覺得按得最好，通常前半段都痛到慘叫，但係好快就鬆晒，後半段無咁痛就可以同呀姐吹吓水，勝在佢唔係點sell我，等我真係可以relax。

傾傾下先知原來佢已經有兩個小朋友，雖然佢老公都有做嘢，但佢都好經濟獨立，除咗返呢份全職，仲有做網上生意賣護膚品，佢都曾經畀人串過：「你識唔識做家務㗎？平時邊個煮飯呀？」但佢好型咁講：「我識搵錢就得啦！有錢我請鐘點返嚟幫手做唔好？」當然，家務佢都識做，只係一星期返五日工，已經攰到無力做家務，同埋有時間都想陪多啲小朋友。

唔知點解好多人都仲係覺得女人就一定要做家務，而家年代唔同咗㗎喇，好多女人結咗婚生咗小朋友都要返工，唔再係以前嘅全職家庭主婦，大佬呀放工都攰到死啦，做少陣家務會死咩？以前就話男主外女主內，但係既然而家男同女都要返工，點解家務唔可以一齊分擔？唔好成日將個責任推晒落女人度啦。

其實男人養家一樣好大壓力，而家咁嘅樓價物價，要一個人養起頭家真係好難，所以女人出嚟做嘢其實係可以分擔好多，基本上係winwin，不過前題係有人幫手湊小朋友，而且唔係個個女人嘅夢想都係做全職主婦，有啲都想有家庭之餘亦有自己嘅事業，有啲又會想做兼職抖吓氣，你估湊仔唔攰㗎？

同樣地，有啲家庭係女人出去做嘢，男人留喺屋企湊仔同做家務，唔知點解呢種男人就會畀人話廢，靠老婆，雖然我未湊過仔，但我覺得湊仔一定係攰過返工，返工都有放工，有假放，湊仔係無，一日廿四小時，仲要集中精神，你話返工都可以偷下懶，放下空，湊仔你一時失神有意外發生就大鑊，其實全職家庭主婦/主夫一樣係好難做，好大犧牲。

男女角色一直都係慢慢變緊，無論係主內定主外，定兩樣都做，最緊要都係互相體諒，同埋唔好L理身邊啲人嘅閒言閒語，總會有人鍾意說三道四，其實只要兩個人開心就得，亦唔使同人交代咁多。寫寫下突然覺得自己父母好勁，阿爸一個人養起成頭家，阿媽就係個持家有道嘅全職主婦，兩個人分工清楚，各自做好自己本份，養到個中女而家肥肥白白，希望第時我都做到佢地咁。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）