每間公司都總有啲仆街喺度蝦蝦霸霸

 

 

久唔久都會聽到有學校發生欺凌事件,其實幾個人圍威喂一齊扮大佬去恰啲弱小呢件事真係好小學雞,但係更小學雞嘅係你會發現原來出到嚟社會做嘢一樣有好多呢啲咁無聊嘅事發生。

可能你淨係想靜靜哋咁做好自己嘅工作,唔想理咩辦公室政治,但係sorry,呢樣嘢係無可能發生,唔係話你唔去惹人就無事,人哋一樣會走嚟搞你,可能你唔一齊食lunch已經會話你唔合群,話晒我都算係順得人,一直以來同同事關係都幾好,但始終避免唔到畀啲仆街釘上。

可能佢唔抵得我同個個都friend,又或者佢工作壓力大想搵人發泄,甚至係佢本身心理變態鍾意搵人嚟鬧,我有試過咩都無做,純粹喺個同事隔離行過都畀佢用粗口鬧。我唔係啲好強勢嘅人,所以一直以嚟都係身邊啲同事幫我出頭,有時都會覺得自己好廢,咁大個人無可能仲次次靠人,仲要啲仆街通常都係襯你得一個人嘅時候先落手。

通常佢哋都係無嘢搵嘢嚟話你,例如話你做嘢太慢/快、食嘢太多/少、太有錢/窮、人工太高/低、住得太遠/近、總之無嚟啦更都可以話你一餐,其實我真係唔知呢啲人咩心態,最狗嘅係咩?就係當你忍無可忍想串返佢哋轉頭,又或者開始西聲黑面嘅時候,佢哋就會話:「講下笑咋嘛,你咁認真㗎!」或者「咁小氣㗎咁就嬲!」然後一嘢將佢哋嘅惡行推卸晒落你度,覺得係你唔啱,你唔夠玩得。

對住呢啲人,你嬲就係中咗計,佢講咁多嘢,搞咁大場龍鳳就係為咗令你唔開心,令你嬲,所以你一定唔可以認真,對付呢啲仆街不外乎都係果幾種方法,第一招就係乜都答:「係呀。」佢地就會好快無癮收皮,「係呀」簡直係話題終結者。

「嘩,乜你呀爸車你返工㗎?有錢女喎,巴閉啦!」「係呀。」
「你今套衫咁樣衰嘅,執返嚟㗎?」「係呀。」
「你咁大食嘅,生蟲呀?「係呀。」

第二招就係吹水吹到去外大空或者同佢哋鬥慘,如果話好窮無錢食好嘢,就話我仲窮呀,窮到夜晚唔食飯㗎,如果話好多嘢做成日要加班,就話我仲慘呀晚晚喺屋企做到凌晨㗎,吹水咋嘛,無人認真講嘢㗎而家。當然,如果真係比人踩到上心口咪爆佢一鑊囉,唔係點啫,忍到就當訓練EQ,同人相處真係要學一世,大家仲有咩招數對付呢啲仆街?不妨開心share,在線等,心急人上。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 219616
Date: 2021-11-17 05:22:27
Generated at: 2021-12-06 10:47:10
Permalink: https://www.vjmedia.com.hk/articles/2021/11/17/219616/每間公司都總有啲仆街喺度蝦蝦霸霸