《喜歡妳是妳》：講下笑嘅女同電影？

《喜歡妳是妳》有好多明買明賣嘅套路，即係你睇到一半離場大概都可以估到點樣走落去嘅電影。觀影過程中，又會不時見到其他電影嘅影子，例如楊偲詠演嘅李芯悅讀到電影系但冇讀完，談善言演嘅李詠藍轉系而且入埋行，過對方想過嘅生活就好似《七月與安生》。又例如李芯悅婚禮march in，回憶往事加想像同現實穿插，再起主題曲將情緒濃度推到最高，就直情九成似足《那些年我們一起追的女孩》。又咁啱，3部戲都係主角書寫返青春嘅故事，當然套路都可以好睇，係睇你點處理。

如果撇除創作者係咪異性戀霸權，肆圖搶佔女同電影話語權同詮譯權嘅爭拗，作為一個異性戀麻甩佬，《喜歡妳是妳》老套得嚟都算可觀，最起碼談善言好睇（呢句已經好Male gaze）。當然，我相信唔少人喺觀影當中對創作者嘅表述不適而無法被感動，但同時我喺戲院聽到嘅開紙巾聲都唔少。

作為一個臭異男，當然冇可能代入女同心態，不過我覺得套戲夾硬將有發生過嘅女同愛情，強行落返姊妹友誼的確令人唔多舒服。可能呢個都係創作者企圖呈現女同志面對現實嘅無奈，唯有將戀愛關係downgrade成友情。但問題係，套戲想呈現嘅已經唔係青春錯摸，唔係嘅話嗰場多次被回憶又大造文章嘅操場激吻戲又意義何在？如果唔係兩位主角真實情感流露又係啲咩？唔通又係貫徹成套戲嘅嗰句「我講下笑」？

不過最令我不明所以嘅係，呢部戲明明已經用李詠藍視點敘事，點解仲要加佢本人讀白？由一開始聽到用讀白講「我叫做李詠藍……」實在有一種想死嘅感覺。影像已經幫你講緊故仔，大家都知呢個係李詠藍嘅故仔，李詠藍覺得自己係呢段關係嘅叛徒，所以隔咗咁多年都係咁耿耿於懷。好多情感其實可以靠談善言演出嚟（而我相信佢都演到），唔使咩都靠佢講出嚟，觀眾其實get到的，抑或創作者自己都覺得偷懶放少咗嘢，要靠讀白強行補完件事？相信大家睇完自有判斷。

作者：阿享

一個戒緊牛肉，但打邊爐仍然會忍唔住既耶青。

閱讀後覺得好，請多多讚好及分享～：）