擁抱好廢嘅自己

「其實3、4萬出面大把工都畀到，我手上都有2個offers，係睇下揀邊份啫。」朋友Kenji說。
「恭喜晒，今次呢份做咩又唔做？」我說。
「加班加到傻，唔同佢搏啦，同埋魚唔過塘唔肥，咁樣跳人工先高，幾時到你跳呀？」Kenji說。
「呢度暫時都幾穩定，唔轉住喇，重新適應都好攰。」我說。

雖然話無比較，無傷害，但係人就係咁犯賤，當你見到朋友都係做同行，年紀差唔多，但title高過你，人工又高你一大截，就會不禁諗：「其實我係咪真係好廢？我究竟邊度做得無佢咁好？」然後就會開始鑽牛角尖，即使你知道唔應該將自己去同人比較，因為人睇你好，你睇人好，無錯佢係高人工，但係佢晚晚加班喎，放工仲要比客捽喎，呢啲真係我想要嘅嘢咩？其實唔係。

除咗人工之外，其實要比嘅話好多嘢都可以拎嚟比較，有無拍拖啦、結咗婚未啦、生仔未啦、有無車有無樓啦等等，要自尋煩惱其實好簡單，理性上你知道「比較」呢件事其實好無謂，但有時總係會受到其他人嘅閒言閒語而影響，而且通常一樣小事就可以牽連甚廣，好易將最近唔順心嘅事連埋一齊。

我份人不嬲都好細膽，對於好多事都會好淆底，好驚自己做得唔好，好驚講錯嘢，好驚人哋唔中意我，於是成日都會諗東諗西，諗晒啲最壞嘅情況出嚟，諗埋點拆，但其實最後可能根本無發生任何事，白擔心一場。朋友同我講過：「其實唔需要對所有人都咁好，亦唔使維持咩好形象，唔中意咪唔中意囉，who cares?」

我成日都好羨慕一啲夠膽發脾氣同西面嘅朋友，因為佢哋從來都唔會委屈自己，有不滿就直接講出嚟，但其實呢樣嘢只要我願意嘅話，我都一樣可以做到，只係我唔敢，然後一諗到呢度，又會覺得自己好廢。

其實平時好地地係無事，但我諗平日幾正面、幾有自信嘅人都總有佢低落嘅時候，無可能24/7都係過住快樂幸福嘅日子，你估童話故事咩？有起有跌先係人生，而且無傷心過，又點會懂得珍惜快樂？今晚要好好擁抱好廢嘅自己，然後一覺瞓醒又係一條好漢。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）