【社會期望】不論誰是誰非，「打阿婆就係唔啱」

今日提早收工回家做節。在地鐵內真係每日都有唔同戲碼上演，今日冬至都有一場世代之爭。

（從對話知道，無目擊到）有個阿婆推住架車仔衝上車，應該係整到或差啲整到一個細路女，個老豆鬧個阿婆唔好整到人，唔好衝入來，跟住個阿婆話啲人唔企入啲咋嘛，你無社會道德呀！（唔知關咩事啦！）個老豆叫佢唔好再嘈！

靜左一陣，突然又嘈，我見到嗰個老豆隻手掂到阿婆塊面，但唔肯定佢係咪想推開阿婆還是隔開阿婆因此出現身體接觸。

阿婆好激動，有個紋眉阿嬸做和事佬，叫阿婆落車啦，你已經過左站喇。唔好再嘈，打阿婆係唔啱。個老豆呢個時候無出過聲，跟住附近有個男人話阿婆架車係整到個細路，但個老豆應該出聲同阿婆講，就唔好用手咯。

阿婆已經唔記得要落車喇，原來當時就係個阿婆想落車，佢應該無望到周圍有無人就拖住架車，走時整到或掂到個細路女，個老豆唔知係想隔開還是推開個阿婆。

阿婆一路鬧人無兒無女，絕子絕孫，我幾十年無俾人打過，大家睇下啦……跟住個男人一家在美孚落車，阿婆跟埋落車，最後點收科唔知啦。

而嘗試勸阿婆個紋眉阿嬸無落車，佢繼續同另外個男人講話唔可以在自己個女面前打阿婆呀，唔啱呀，唔好榜樣呀，唔怪得香港攪成咁呀！
跟住有個男人話，唔係阿婆就大曬嘅
女人話，我唔係話阿婆大曬，咁唔應該打阿婆。
男人話，你都唔知成件事係點！

好彩呢個紋眉阿嬸都落車，如果唔係又有交嗌！

本人日日地鐵返工放工，確實見唔少老人家反應敏捷，左穿右插，繁忙時間衝鋒陷陣，搶點一流，邊個夠膽同老人家爭位坐？有時見佢地拖住架車仔如入無人之境，唯有自己避開，否則俾佢架車仔輾過對腳都唔出奇。社會上大部分人都期望成年人對老人要禮讓，但有無底線限度？係咪人一年紀大就可以單純因為年老而享有特別待遇？？例如霸尖、搶位、橫衝直撞而無需要道歉？只要不早死，大家都有年老嘅一日，機會均等。你今日係一個咩人，到老極有可能都係咩人。我意思係你嘅性格大致已養成，性格好大程度唔會因為年紀而改變。後生時候係一個自私自利，野蠻無理嘅人，係咪到佢年紀大就會變得德高望重？？我不敢苟同。只不過，在社會大眾期望下，對老人不忍讓就一定係你錯啦！今日個老豆擺明係愛女心切，護女變左「打」阿婆，冬至流流，攪到上差館就無謂啦。下次真係唔好咁衝動喇，唔係又會有人話唔怪得香港攪成咁。明明香港繁榮穩定行穩致遠，仲有國安法呢支定海神針，呢位紋眉阿嬸話香港「攪成咁」 究竟咩意思？？

作者：阿貓

閱讀後覺得好，請多多讚好及分享～：）