其實我真係好怕要諗送咩禮物

 

「你情人節想要咩呀?我買畀你吖。」我說。
「我無咩想要喎,唔送都OK。」男朋友阿奇說。
「你之前咪睇中咗個空氣清新機嘅,不如買畀你。」我說。
「其實我唔係好慣咁樣,好似叫人畀錢買嘢咁。」阿奇說。
「但我真係唔知你想要咩,我驚買咗你唔啱用,我見你好多嘢都想買但又遲遲唔落手,我唔知你係咪真係想要…」我說。
「其實你買咩我都鍾意㗎,男人無咩所謂呢啲。」阿奇說。

一年入面有情人節、生日、週年紀念、聖誕節,有啲人可能仲有相識100日、500日等等,如果每個節日都要諗送咩禮物,真係諗到頭都爆,仲要每年唔可以重覆喎,簡直打大佬,難度不斷升級。有啲人做手作嘢好叻,又成日都有idea整咩比人,我有個女仔朋友就試過為每個朋友整生日驚喜,彈彈盒、木相架、年曆、皮卡套等等,我問佢你唔會覺得成日整呢啲好辛苦咩?佢話唔會,仲好enjoy,但好可惜我唔係呢類人。

我份人比較實際,應該話愈大愈實際,我唔想嘥錢買啲原來唔岩用嘅嘢,屋企又唔係大,放喺度掉又唔係,但又無用,都唔知點搞。至於手作仔,好明顯我淨係識寫嘢,叫我整嘢真係手殘,我最叻剪剪貼貼仲無乜美感,我唔係無諗過去整啲皮造嘅嘢,但我已經想像到會整得好樣衰,雖然佢實話唔介意,如果佢拎嚟用仲慘,實比人笑啦:「嘩,乜你條女整啲咁嘅嘢你用呀咁大整蠱。」

我都明白問人地想收咩真係好似好無驚喜,好無心思咁,但我真係想買樣啱用嘅嘢,其實買禮物可以好簡單,我可以唔理你鍾意咩,純粹買我覺得好嘅嘢比你,只係我唔想咁,我承認我係好麻煩。其實除咗另一半,仲有好多情況都要諗買咩禮物,例如屋企人生日(大個之後我已經用利是代替)、朋友生日(已經變咗請食飯)、新居入伙、拜年上人屋企、聖誕抽獎等等,當然苦惱嘅程度會大大不同。

為咗令大家嚟緊情人節唔好咁難做,無論係男定女,拿拿臨話我知你想收到咩禮物,等我做個統計兼畀啲idea大家,據我所知男人係想收到PS5?定係已經out咗喇?女人就應該想收花或者Mirror代言嘅嘢?成日都見到啲post問買咩畀另一半好(呢篇已經係XD),但每個人想要嘅嘢都唔同,咁點解我唔直接問我男朋友想要咩?喂!阿奇,你究竟想要咩?見字請回覆,心急人上。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 220487
Date: 2022-02-06 17:58:01
Generated at: 2022-06-26 13:48:46
Permalink: https://www.vjmedia.com.hk/articles/2022/02/06/220487/其實我真係好怕要諗送咩禮物