【外賣仔日記】送生日蛋糕

呢單嘢係呢波疫情前發生，唔係近排。

接到張送貨嘅單，唔係外賣單嚟，係貨物單嚟，但係我就係送蛋糕。唧晒花嘅杯仔蛋糕，佢連埋一個有幾層嘅膠架去放呢啲杯仔蛋糕。一個宴會，有啲杯仔蛋糕放響個架到俾賓客攞咁樣。

呢啲多數都係有人生日或者party 先會嗌呢啲嘢杯仔蛋糕架啦。

咁我驚大家唔知啲生日人士係咩樣，我有張示意圖比大家參考下。

生日人士示意圖，非事件當事人。

咁佢個放蛋糕仔嘅膠架係拆散咗嘅，未砌嘅，好似啲盒裝模型咁，你要自己砌。咁我點知佢係一個宴會呢？因為送貨地址係一間酒樓嚟。咁呢啲貨攞咗就要直接送去，個陣係下午茶時間嚟，order 嗰個客未必響酒樓，咁出發前已經call 個客問吓點交收之類，可能酒樓直接代收都唔奇，咁佢哋都有雪櫃，我又唔太擔心會有咩大問題阿。

嘟 ～ 嘟嘟

客：「喂？」（一把港女格嘅聲嚟）
我：「你好呀，速遞公司打嚟架，係咪有蛋糕要送去酒樓？」
客：「係呀，佢係咪連埋個膠架比埋你呀？」
我：「係呀，佢有個膠架俾埋我」
我：「我係咪送去俾酒樓就走得架啦？佢哋會代收？」 客：「係呀」
客：「佢係咪砌好咗個架啦？」
我：「唔係呀，佢未砌呀」
客：「喂，咁你唔好走住阿，我邊度識砌呀」（港女格嘅高音）

我心諗，砌呢個膠架關我呢個速遞員咩事？

我：「Er，你好啊，我係速遞員嚟架，好似唔係我要做嘅嘢嚟」
客：「咁我轉頭再打返俾你啦」

然後呢個電話就不明情況下收咗線

去到酒樓前，佢話打返俾我，到最後都無收過電話。

去到酒樓，交咗所有嘢俾啲侍應，我就call 返個客

嘟 ～ 嘟嘟

客：「喂？」
我：「啲嘢俾晒酒樓職員㗎啦」
客：「OK，唔該晒你啊」

我心諗？What？你個架唔洗砌啦？

專題：【外賣仔日記】

作者：外賣仔

閱讀後覺得好，請多多讚好及分享～：）