到底由幾時開始，認真係會畀人笑？

讀書時期，認認真真讀書果啲通常都會畀人話係書呆子，通常都無乜朋友，然後口講話無溫過書，晚晚淨係掛住打機，但係拎到好高分果啲就會畀人一種醒目仔嘅感覺，當然你唔會知佢係咪真係無溫書。

畢業之後出嚟做嘢，情況一樣係無變，你認認真真，默默咁做嘢係無用，因為往往比老闆讚，升職加人工嘅都係果啲識擦鞋，A字膊，走精面嘅人，反而認真做嘢嘅人只會畀人話係傻仔。無錯你可以自己繼續認真做，但係時間耐咗你會發現付出原來得唔到應有嘅回報，分分鐘仲愈來愈多人隊嘢你做，條氣就會唔順，於是慢慢你就開始學識點樣喺老闆面前扮忙，點樣同同事打好關係，因為識人好過識字，職場上多個朋友點都好過多個敵人。

「仲喺度OT？老闆都走咗啦，無人睇到㗎！」同事Bibi說。
「我未搞掂份新聞稿，就嚟deadline喇。」我說。
「聽日先搞啦，咁勤力你搏升咩？」同事Bibi說。
「執埋少少grammar啫。」我說。
「你上一手都係Google translate咋嘛，使乜咁認真，走先喇拜！」同事Bibi說。

最近新識嘅朋友或者同事，當中都有啲係好鍾意講笑，十句有八句都係講笑，有時就講嘢九唔搭八，吹水吹到上太空，初初我仲成日信咗畀佢地笑，後來我決定咩都唔信同佢哋亂吹一通，又或者係避得就避，因為其實9吹好嘥我時間。我同朋友一齊當然都會講下笑，但唔會句句囉，咁樣好無意思，但好多人都樂在其中覺得好好玩，或者佢哋純粹係想搵人嚟笑，娛樂吓。

「喂，睇你IG又轉咗新仔喎。」我說。
「係呀，之前果個唔係咁夾咪搵過第二個囉。」朋友Sophie說。
「你轉咗好多個喇喎，幾時搵個認真拍下呀？」我說。
「拍拖啫，又唔係做人世，認真便輸了呀你未聽過咩？愈認真咪愈受傷囉。」朋友Sophie說。
「咁樣真係開心咩？」我說。
「開唔開心，你試下咪知囉，哈哈！」朋友Sophie說。

「認真」呢兩個字唔知由幾時開始由正面慢慢變咗負面，唔再被人appreciate，大家都好似變得好唔在乎所有嘢，就算個心係在乎，都唔可以表現出嚟，因為驚會畀人笑，或者畀人話唔玩得，其實愈來愈少人認真，就更加需要珍惜呢啲仍然會認真嘅人。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）