原來同男友兩個都喺香港，都可以有Long D 嘅感覺

疫情前，我同男朋友通常一星期見兩、三日，疫情後，特別係無咗晚市堂食之後，就少見咗好多，主要都係喺屋企Facetime，因為無堂食都唔知可以去邊，平日夜晚放工後係有諗過買外賣喺公園食，但係又好似好慘，星期六日諗住去下啲戶外地方呼吸新鮮空氣啦，一係就落雨，一係就人山人海。

早排疫情嚴重，佢大廈同我大廈都輪住有確診，之後就到我地嘅同事輪流確診，日日幾萬宗好似一出街就中咁。其實我唔係驚自己中，我係驚中咗之後傳咗畀屋企人，始終佢地年紀都唔細，加上如果唔好彩畀人捉咗去隔離，啲貓貓狗狗邊個照顧？屋企人都唔想我地出咁多街或者喺街食飯，所以好多時見面都係喺大家屋企，同埋屋企人一齊食飯，喺我角度咁就唔算兩個人拍拖嘅私人時間啦。

疫情爆得好勁果期我地兩個都開始WFH，就諗住搵日偷雞出去食個lunch啦，但係往往一出去就會有同事急call，唔係我奶嘢就係佢奶嘢，搞到食完飯趕頭趕命飛返屋企，我地又住得遠，就算揀中間點食飯返屋企都要啲時間，試過一兩次之後我決定帶埋部手提電腦出去，有咩事都可以即刻開工，好神奇地明明平時無人會lunch time搵我㗎喎，我一千零一日出咗去就即刻有大單嘢，咁我唯有喺間拉麵店打開部電腦睇睇啦，食食下啲同事又輪住打嚟，人地唔知真係以為我秒秒鐘幾百萬上落。

抗疫疲勞我一直都有，因為我係好鍾意出街食好西嘅人嚟，而家局住要喺屋企煮，仲要煮得唔好食果下慘，加上最近又有工作壓力，以前都話可以同男朋友拍拖同呻下，或者同朋友吹水減下壓，而家咩都唔得，淨係困喺屋企，無足夠嘅私人空間，心情成日都好煩躁，都係靠煲劇同做yoga去分散下注意力。

疫情令我發現原來想簡單拍個拖，普普通通食個晚飯都唔係咁易，其實唔止拍拖，連朋友都已經好耐無見，雖然都有keep住signal傾下計，但係始終唔及面對面吹水咁開心。可能人都係犯賤，係要失去過先會更加珍惜，希望疫情快啲好轉，大家都可以過返啲稍為「正常」嘅日子。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）