對自己最mean 嗰個原來就係我自己

最近工作仍然係好忙，壓力都大，加上喺公司做咗夾心人，受咗唔少氣，諸事不順，負面情緒氾濫，所以久唔久都會喺度放負。老老實實雖然工作量係多，但其實做熟咗就算得自己一個都處理倒，最大問題係做嘅過程中牽涉好多西同事，點為之西？卸膊啦、扮忙啦、搞是搞非啦、無理取鬧啦，仲有好多好多，要數真係數天光。

西同事基本上間間公司都有，只係睇你點處理，而我就係太腍善唔識拒絕人，於是愈來愈多同事搵我幫手，或者將佢地唔鍾意處理嘅人或事掉俾我，雖然公司細細但都分咗兩派，我無明確入到邊派，同每個同事都傾得幾句，即係和平主義者，所謂嘅爛好人，於是成日要做傳聲筒，令到佢地可以好好溝通，唔好影響我嘅工作，呢一點連老闆都發現咗，成日啲唔關我事嘅會都叫我一齊開，嘥咗好多時間。

「其實你唔需要對個個都咁好，亦唔需要維持好人嘅形象！」

我完全明白，但係往往到果個時刻又會做唔出，個勢唔夠強就會俾人食住，通常啲西同事都係大聲夾惡兼理直氣壯，只有你錯佢永遠唔會錯，我次次都唔夠人講，本身做份內事已經好忙，仲要做埋人哋果啲，喺咁趕嘅情況之下當然會有甩漏，精神壓力又大，跟住就會覺得自己好廢，明明有好多地方都可以做得更好，點解唔識反抗啲西同事，點解咁小事都做唔到？

加上之前仲未開返晚市堂食，想話同朋友食個飯呻下嘅機會都無，在家工作困喺屋企，感覺好鬱悶，好易躁，好似睇咩都唔順眼咁，疫情前成日出街，留喺屋企嘅時間唔多，所以無發現私人空間係咁重要，有時唔開心想喊下都無機會，因為唔想屋企人擔心。

好彩而家有返堂食，我出返街食好西之後心情好咗好多，通常我每次唔開心都會寫文，當係一個同自己溝通嘅渠道，了解返自己嘅諗法，然後我發現之前嘅我實在對自己太mean喇，明明已經做到隻狗咁，仲要怪自己做得唔夠好？唔係掛！係咪癡咗線！？反而應該要好好獎勵自己先啱啦！至於西同事方面，就慢慢努力去對付佢地，總有一日可以食返佢哋轉頭，再唔係鬥長命囉我後生過佢地咁多，全部都係old seafood嚟嘅。我唔知有無人都係好似我咁樣，我淨係想講放過自己啦，愛自己多啲，慢慢就會變成一個更好嘅自己。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）