各位會員唔好誤會,你$440入會費只係買左個 #抽飛權

【各位MIRO留意!!!】
MIRROR將於7月首次於紅館舉行演唱會,為咗令MIRO更容易入場支持MIRROR,Fan Club已經預留限量門票並將舉行抽籤認購活動。…

MIRROR 發佈於 2022年5月13日 星期五

 

今日睇到呢個Post 即刻爆粗。有無攪L錯呀?你Mirror 演唱會主辦單位係咪癲L 左呀?無端端攪個官方歌迷會每位年費四百四,個個以為可以有比較大嘅抽飛機會所以狗衝加入成為會員,然後你今日話我知原來作為鏡粉歌迷會會員所謂可以抽籤買飛(係要俾錢唔係送呀攪清楚!)名額只係得2500個,講緊係十場演唱會2500個名額,唔係每場2500個。一個名額可以買到兩張飛, 即係十場演唱會官方歌迷會嘅歌迷只係卑微地獲配給5000張飛。咁你地啲飛去左邊度呢??

首先,之前什麼city the club 特選客戶可以優先定購,由於本人賤過地底泥所以梗係無得參與呢次優先訂購啦,咁好啦,跟住話有渣兜嘅Mox 卡可以優先訂購,咁我又即刻申請碰下運氣啦,預左唔夠啲炒飛友個電腦程式鬥但都叫做參與左,浪費我人生中寶貴嘅四十五分鐘,然後叫你重試重試重試……….

即使呢度買唔到飛都唯有認命,因為我以為官方歌迷會會員抽簽機會應該會大啲嘅,咁我俾四百四十蚊搏一搏都叫可以一試,唔通真係貪你啲迎新禮品咩?點知今日先發現原來歌迷會都只係得五千張飛咁大把,真係一萬字嘅粗口都不足以洩憤。

『紅館呢個表演場設有12,500個座位,其中10,400個為固定座位,另設約2,000個活動座位,可以按舞台設計彈性編排,靈活巧妙地配合不同的舞台設計。』(抄官方資料)我當你一萬個位啦好計啲,因為疫情關係,到七月當你有七成入坐率,即係一場有7000個位,十場係有70000個位,咁你收人幾千萬會費,實際歌迷會人數唔知,但如果保守估計你有七萬個會員的話,你Makerville 齋坐系度收會費都三千幾萬,  咁你手指嚹漏5000張飛出來賣俾會員,即係一場俾會員睇都無,咁請問你地當啲會員係咩?賤過你啲客戶廣告商贊助商啦?!聽講富衛客戶買滿某金額嘅保單都有演唱會飛,我地呢啲課金會員就梗係什麼都不是啦係咪??

我有幸去過日本睇Smap 解散前嘅演唱會,人地啲飛只係俾歌迷會會員抽,唔會有咩贊助商廣告客戶要應酬,所以絕大部分嘅會員係會抽到演唱會飛,而飛上面有嗰個會員嘅姓名,咁樣令到即使有黃牛飛,但始終大部分嘅會員都可以睇到演唱會。唔好講日本,香港Sammi 軒公,佢地都有專屬歌迷會,Sammi 歌迷會係一定會買到演唱會飛,軒公都有一場係專門俾歌迷嘅演唱會啦!!學吓人地吖唔該。如果唔係你攪個官方歌迷會做乜?擺明cap 水啫。十二個鏡仔根本各自有歌迷會組織應援,使咩你makerville 收人錢又分一杯羹?!

依家好多人好嬲就係你地主辦單位究竟放幾多飛出來賣俾公眾??你地自己hold 左幾多飛招呼貴客?你地應該攪清楚一件事,無左啲粉絲你地唔會有咁多贊助商廣告商,唔會有雙位數字嘅廣告增長,你攪清楚你地嘅金主係廣大嘅鏡粉!!無佢地幫襯shiseido payme fendi LV  YSL Osim 雅蘭床褥黑人牙膏益生菌可口可樂麥當勞不能盡錄嘅產品,你覺得你地viu 可以轉虧為盈?!姜濤灣係你地makerville 攪出來咩?都係一班姜糖真金白銀攞錢出黎攪嘅生日會!!

唔該攪清楚一點,鏡粉唔係要你送飛俾我地。四百四入會費唔係為左免費要你演唱會飛,你唔使送俾我地,我地只係想真金白銀買到飛入場而唔係買黃牛!! 我聽到啲鏡仔叫大家唔好買黃牛飛我真係覺得難聽過粗口!!你地係無辜嘅,但問題係你地公司逼大家買黃牛飛咯!!!你有誠意嘅不如話俾大家知你啲飛點樣分配吖?睇下我有無怪錯好人咯。

仲有,你要應酬呢啲客戶,你咪搵Mirror 閉門攪個私人派對形式嘅演唱會咯,唔使預啲歌迷吖!你依家名義上去紅館開十場,但如果你hold 嘅飛係多過賣俾街客嘅,咁你開黎做乜??演唱會唔係俾Mirror 粉絲睇,而係滿足你viu TV 客戶啲客戶? 咁就非誠勿擾啦!

作者:憤怒鳥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 221828
Date: 2022-05-13 23:46:30
Generated at: 2022-06-26 05:04:20
Permalink: https://www.vjmedia.com.hk/articles/2022/05/13/221828/各位會員唔好誤會,你440入會費只係買左個-抽飛權