自己嚇自己事件簿

 

咦?阿奇打過嚟兩次喎,miss咗,打返去先!無人聽嘅?唔通佢唔小心㩒錯制?無幾耐佢又打嚟…
「喂?喂?」我說,但係另一邊無聲,跟住仲cut埋線,佢明明揸緊車㗎喎,點解會打嚟嘅?我驚佢唔知有咩事,所以又打返電話畀佢,第一次無人聽,第二次終於接通。
「喂?你做咩事呀?」我說,另一邊今次只係有啲好微弱嘅雜聲,然後過咗一陣,又cut咗線,可能細個睇得電視劇多,好多撞車情節即刻浮晒出嚟,即係架車反咗困咗喺車郁唔到,漏緊油除時爆炸果隻,唔通佢係打嚟求救!?唔好嚇我呀大佬,就喺我不知所措嘅時候,佢就send咗個msg嚟話:「唔好意思呀喺架車度執緊嘢,啱啱先睇到原來㩒錯打咗畀你。」然後我同佢講頭先嚇死咗。

唔知係咪坐佢車見過太多人亂咁揸車,我成日覺得喺香港揸車好危險,近呢幾年交通意外都多咗咁,就算你揸得好小心,但你都控制唔到其他人點揸,路面上係會有好多突發嘢,例如前面架車無啦啦急剎、隔離線嘅車唔打燈突然cut埋嚟、你打燈想cut線但人地即刻比油衝上嚟唔比你過、大車開到過晒線、突然cut實線、車路無啦啦有行人衝出嚟等等,可能我唔識揸車見到咁就覺得好危險,放心為咗大家嘅人身安全,我都無打算學。

除咗坐車嘅時候會驚意外發生之外,其實平時行街,如果喺啲車後面行過,條路又窄嘅話,我都會諗佢會唔會突然倒後夾死我,如果喺大貨車前面行過,會唔會有盲點佢睇唔到我開車撞到,係好杞人憂天,但係行過果刻總係會有呢個諗法,起初我以為淨係我先有咁奇怪嘅諗法,後來同朋友傾開,原來佢都會咁諗,仲比我嚴重,於是佢就走去睇臨床心理學家,然後個醫生就用以下嘅例子去同佢分析。

假設你喺行人路上面行,然後你諗架車會唔會剷上嚟車到自己,咁你就要問自己:「架車有無開到左搖右擺先?車速如何?條路係咪好窄?呢度係咪交通黑點?要用理性去分析你擔心緊嘅事會發生嘅機率,然後你就會發現其實只係自己過份擔心,杞人憂天啫。」用呢個例子你當然可以好輕易話係諗多咗,但其實生活上或者工作上都有好多事你可能都過份擔心或者緊張咗,分分鐘最後直情唔會發生,當局者迷,難免有時會鑽咗牛角尖,呢個時候就要理性啲去分析,唔好畀感覺控制住,講當然簡單,都係要靠自己慢慢實踐。

做人最緊要開心,順其自然,見步行步,諗咁多都無用,早抖啦,聽日準時返工呀!

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 221892
Date: 2022-05-23 07:37:52
Generated at: 2022-06-26 09:40:15
Permalink: https://www.vjmedia.com.hk/articles/2022/05/23/221892/自己嚇自己事件簿