【又消費券】第二期消費券揀邊間好？好唔好轉會去新嗰兩間？

嚟緊第二期電子消費券，政府加入咗兩間全新嘅電子支付平台俾市民選擇，亦都即係容許市民重新選擇使用佢哋消費券嘅電子支付平台，呢篇文就同大家睇下新個兩間消費券電子支付平台，睇下邊間較為災難，邊間多伏位，邊間比較正常，比大家參考下應唔應該轉會。

政府就公佈咗第二期電子消費券，加入咗兩間全新嘅電子支付平台，市民可以選擇更改領取消費券嘅電子支付平台，以下為發放第二輪電子消費券嘅儲值支付工具營辦商。

（排名不分先後）

PayMe from HSBC

BoC Pay

支付寶香港

八達通

Tap & Go拍住賞

WeChat Pay HK

如果想轉會去新個兩間，但係又唔太知應該揀邊間，又或者唔熟悉新個兩間嘅電子支付平台，下面同大家詳細講下。

溫馨提示大家，唔好因為啲少少嘅優惠就「轉會」，隨時會令到你嘅消費券冇地方可以用。

兩間新加入嘅電子支付平台，分別為滙豐嘅 PayMe from HSBC 同埋中銀嘅 BoC Pay，呢兩間好似都無咩問題，尤其係PayMe，好多香港人都有，消費券轉會落去好似幾唔錯，但係我提醒大家真係要小心選擇，PayMe 同埋 BoC Pay 暗藏好多伏位。

# PayMe：

介紹下PayMe 先，PayMe 好多人都有，亦都好似有好多「商戶」接受PayMe 付款，但係要留意，使用PayMe 作為你嘅消費券平台，你嘅消費券支付對象係只可以支付給「商業」PayMe 帳戶。好多「商戶」宣稱接受PayMe 付款，其實好多都係使用緊「個人」PayMe 帳戶收款，你如果要使用PayMe 消費券嘅錢去消費呢？就要搵一間用緊「商業」PayMe 帳戶嘅商戶。咁「商業」PayMe 帳戶多唔多？我想講有「商業」PayMe 帳戶嘅商戶，多數同時間會接其他有消費券嘅受電子支付平台，但係有其他電子支付平台嘅商戶，就反而未必有「商業」PayMe 帳戶，選擇PayMe 作為你嘅消費券支付平台？你要真係好小心諗下。

# BoC Pay：

跟住到BoC Pay，我諗好多香港人都冇聽過或者用過。簡單介紹下先，佢嘅支付方式有接受BoC Pay 嘅商戶，接受銀聯二維碼嘅商戶（唔係銀聯卡，唔好搞錯，BoC Pay冇提供銀聯卡號碼俾大家），同埋商業版轉數快qr code。先講下佢嗰個獨家嘅BoC Pay 支付，同PayMe 係一樣要「商戶」戶口，老實講，連PayMe 咁多人用，先叫做得個少量「商戶」有「商業」PayMe 帳戶，BoC Pay 呢個支付方式，你當無都得啦。咁當然，佢有另外兩個個支付方式，叫銀聯二維碼同埋商業版轉數快qr code，本身唔洗啲商戶額外申請都可能會有。不過咁，一直都係消費券支付平台嘅「 Tap & Go拍住賞」，都可以使用銀聯二維碼同埋商業版轉數快qr code，佢哋仲要有mastercard 號碼，銀聯卡號碼（唔係銀聯QR code），咁點解要用BoC Pay 先？Tap & Go拍住賞多咁多渠道去比你消費喎。

所以你應唔應該揀PayMe 或者BoC Pay？

PayMe 唔太建議，真係因為唔多地方可以用，但係都唔少嘅，你想轉去PayMe真係好小心諗下。

至於BoC Pay 係直頭唔好揀，入面有嘅三個嘅付款方式，一個係廢嘅，另外個兩個，「 Tap & Go拍住賞」本身都有，而且用「 Tap & Go拍住賞」仲有更多其他方式付款，點解要揀BoC Pay？用BoC Pay 嘅朋友，我真係祝你好運，希望你用得晒消費券嘅錢啦。

作者：電子支付違規關注組

閱讀後覺得好，請多多讚好及分享～：）