【外賣仔日記】小學保安：「上緊堂唔方便俾你入去喔！」

早排接咗張外賣單，送去一間小學到，個時間係一個番學日嘅中午嚟，嗰間小學入面啲小學生係仲上緊堂，未放學嘅時候嚟。學校入面應該有老師嗌咗個外賣，因為個客備註話「到咗唔使打電話聯絡，直接放校務處就OK」。

咁佢指引清晰，都處理到嘅，同埋就算指引唔清晰，學校咁多職員，要有人負責收外賣唔難啊。

我準備行入學校正門之前，張單一直都好正常，但係去到間小學門口就開始發生咗啲好神奇嘅事啦。

我去到正門，佢有個保安更亭嘅物體響門口隔離，入面有個校工坐咗響度。

我就去更亭叫個校工開門比我。

我：唔該，送外賣阿。

（佢就響更亭行出嚟）

校工：麻煩先登記啊

我：OK

我登記完之後，個校工就話

校工：你而家唔可以入去學校啊，啲學生仲上緊堂。

（我心諗：都正常啊，始終仲上緊堂，我唔比亂咁響學校行都合理）

但係根據顧客指示，我要送去校務處。

我：咁點處理？你哋有人嗌咗外賣。

校工：我唔知啊。

然後附近有其他路過嘅校工

校工：佢要送外賣啊，點算？
路過嘅校工：我都唔知喎。

我個陣心入面係即時吓咗一聲，然後響度諗，What？你係呢到嘅管理員之一，然後同我講有人嗌左外賣你唔知點處理？你仲要係坐門口嗰個喎。

路過嘅校工：不如你打電話問下校務處啦。

然後佢就打咗個電話問其他人

中間啲電話經歷過一大堆莫名其妙嘅行政交流，然後個校工就收咗線。

最後點？ 經過一大輪行政，個校工最後就攞咗呢位老師嘅外賣，拎咗去校務處啦。

我心諗，痴撚線，我嚟送份外賣比一間學校嘅老師，點解都可以產生咁勁嘅官僚呢？

你唔比我入學校，個老師又應該上緊堂，唔得閒出嚟攞外賣，咁就唯有得一個方法處理，就係比你攞入去教員室或者校務處，我真係唔明點解件事無SOP ，你就唔會識得處理。我真係做咗咁多年第一次見。

專題：【外賣仔日記】

作者：外賣仔

閱讀後覺得好，請多多讚好及分享～：）