珍寶海鮮舫的沉沒事件

 

「珍寶海鮮舫」

由輝煌,走向燈滅,最後消失…

21/6/22

KEVIN CHENG Photography 發佈於 2022年6月21日 星期二

 

琴日大新聞莫過於珍寶海鮮舫在南中國海沉沒呢單。唔好講點解會沉啦,好似話係天氣不似預期,反正沉左就係沉左。好過當初話移送去一個秘密地方懶神秘咁,唔知以為係衛斯理小說入面啲劇情,係咪移送返去外太空?!

首先,我地要知道珍寶海鮮舫其實係點解會最後沉沒呢?係有一個過程嘅。根據維基資料,「海鮮舫由香港仔飲食集團負責管理,到2020年11月捐贈珍寶海鮮舫給予海洋公園,海洋公園在2021年底通知,未能找到合適的第三方機構營運,不能落實施政報告之捐贈計劃。2022年6月海事牌照到期,決定移離香港。 於2022年6月14日啟航離港,至6月18日下午,當行駛至南海西沙群島附近水域時,遇上風浪,船身入水開始傾側。負責航程的拖船公司經過嘗試救援後不果,海鮮舫最終於2022年6月19日全面入水翻轉沉沒於南海。」成件事就係話,無人肯接手營運海鮮舫,呢間大家口中象徵住香港嘅茶樓無人肯認頭呀!咁其實原因好簡單啫,香港商人都係講利益啫,有錢一定搵,咁無錢搵仲要真係掉錢落鹹水海嘅,無人咁抵諗願意啃左佢咯。資料顯示,珍寶王國自2013年起,入不敷支,持續虧蝕,2020年新冠疫情下,生意慘淡大家心照啦。累積虧損超過一億呀!咁既然呢個係香港地標,點解無人幫襯呀?點解由得佢執笠呢?香港人就係咁,香港有幾多人去過呢度??我自己去過三四次左右,只係覺得食物唔錯,但僅止於此,無勾起我任何情懷。當成架船擺系度就無人理,當道具當裝飾品,好喇,依家要執笠喇沉左喇就大驚小怪傷春悲秋,香港過去幾年有幾多經營左幾十年食肆執笠??每次老字號執笠前一兩個禮拜就特別多人湧去打卡幫襯,跟住hashtag#留下只有思念  #香港又少一間酒樓 #不再熟悉的香港  , 睇到呢啲我只係覺得矯情咯唔該。舖頭唔係話執就執,係頂左好耐,頂唔順先要結業,咁鍾意嘅,講到香港地標咁嘅,點解未執笠前唔多幫襯呀?

最好笑係見到網上哀鴻遍野,又話海鮮舫沉沒象徵香港沉沒呀乜乜物物,回歸25年沉船呀乜乜物物,特別係我留意到唔少移英港人特別興奮呀!可能呢單沉船事件確係為佢地沉悶生活增添唔少色彩嘅。香港唔陸沉,點證明佢地去英國係正確呢?香港唔仆街,咁佢地咪好戇居?所以我見呢批人好多都好鍾意share 香港新聞(香港新聞香港人唔知咩,唔使你英國人share啦唔該!),主要係仆街嗰啲啦,因為見人仆街自己最高興吖嘛,我明呀呢啲心態。離開自己地方去到一個完全唔同嘅國度,有幾多問題有幾多掙扎不足為外人道,為左平衡內心不安焦慮,一定係要搵理由去justify 自己嘅決定係正確嘅。而點樣去justify 呢,咪不斷在香港新聞中尋找安慰咯。你唔會見到佢地share英國 新聞呀!照計你地人在英國,好心就留意英國時事啦,你日日睇香港新聞睇viu 做乜呢??你唔係應該睇BBC, The Telehraph,  睇英劇聽Adele 咩?你只係個肉身過左去架咋?靈魂仍然留系呢度,咁樣好咩??即係你覺得你老公仆街包二奶唔理仔女,你同佢離婚嫁過另一個,但離婚後你又日日掛住前夫,追踪佢ig,完全無理過新老公嘅喜好想法感受,咁係咪要迎接二度婚姻失敗呢?還是諗住有朝一日重投前夫懷抱呢??

作者:憤怒鳥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 222421
Date: 2022-06-21 22:04:48
Generated at: 2022-07-05 15:15:32
Permalink: https://www.vjmedia.com.hk/articles/2022/06/21/222421/珍寶海鮮舫的沉沒事件