「媽劇停」之苦

 

最緊忙緊咩?忙緊請人,你無睇錯,我終於可以請人喇!唔使再一個人頂晒所有嘢,好感動!起初我滿心歡喜,以為會有好多CV send過嚟,點知原來10份都無,仲要有幾份係印度人,我唔係歧視佢地,只係唔識中文真係搞唔掂,好難勝任「媽劇停」嘅工作。

初初8成CV都係男人,我都見咗幾個,一係經驗太少太怕醜,講嘢好細聲,雖然小dede咁樣幾可愛,但係姐姐都唔可以請你㗎,溫馨提示:見工對答真係要大聲少少,有自信啲,就算心入面淆緊底都要扮無嘢,你當住自己係演員先,要好好咁演呢場戲,始終「媽劇停」要同好多人溝通,太內向唔係咁適合。

一係就太有經驗,識嘅嘢仲多過我,大我十幾年,要求嘅人工完全超出預算,我真係無辦法請你呀,除非公司炒咗我啦,而且如果要你屈就做我下屬,我諗你條氣都唔順啦應該。此外,都有啲人係對人工要求唔高,但就無乜相關經驗,一直喺朋友/親戚公司打工,所以基本上一遇到啲有相關經驗嘅我都會即刻叫佢嚟見工,但有幾個都未嚟見工已經話有其他offer喇,乜出面真係咁缺人,咁好景咩?

好在皇天不負有心人,我最後都搵到幾個合適嘅人選,但從佢地嘅對話之中我睇到做「媽劇停」真係好辛苦,亦睇到以前嘅自己。

「我辭職係因為太多OT,話收6點,但我晚晚做到11點。」
「公司文化係愈遲走愈勤力,於是個個做完嘢都唔收工。」
「好多工作都只係重重覆覆,打雜咁,我想有多啲發揮。」
「一個人要跟成十幾個客,放咗工或者放假啲客都會搵,無晒私人時間。」

我自己都係做agency出身,試過加班到凌晨,亦試過長期都胃痛,鬼咩一畢業無乜經驗in-house點會請,而in-house最鍾意就係請做過agency嘅人,因為貪你落手落腳做過,捱得,有經驗,好彩嘅捱幾年入返in-house度做,就唔使再過呢啲非人生活,不過做in-house都要睇你好唔好彩,公司咩culture,老闆係咩style,我就最憎果啲覺得你OT就係勤力嘅人,其實交到貨就得啦,work life balance真係好緊要,用到個員工盡,效率真係反而會下降。

而家聽到啲見工嘅人喺度話好多加班所以辭職,我心入面都會想講:「做得好呀!咪鬼做呢啲工,捱壞咗你第時就後悔!」啲公司唔應該因為你係fresh就搾乾你,人工勁低但加班勁多,可惜我得一個位,只可以揀一個,呢度雖然都好L忙,但至少唔多OT,「媽劇停」嚟講算好奇蹟㗎喇,希望新人順順利利,適應喺度工作,咁我就可以放下假,好耐無放假,攰死我喇。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 222553
Date: 2022-06-28 21:59:06
Generated at: 2022-08-17 03:25:20
Permalink: https://www.vjmedia.com.hk/articles/2022/06/28/222553/「媽劇停」之苦