點先係好上司?

 

最初出嚟社會做野,一直都係做小薯仔,亦都無咩野心,覺得畢業出嚟有人請已經好好,辛苦啲捱下都要㗎喇,加班到凌晨、十幾日唔放假都覺得好濕碎, 後生嘛,有團火,瞓一覺充返電就無事啦,後來過咗幾年就發現唔對路喎,成日胃痛、頭痛、甩頭髮,於是休息咗一排,寧願搵份穩定又舒服啲嘅工算。

然後又過咗幾年,開始思考自己嘅將來,我諗無人甘心成世做小薯仔,拎果丁屎人工,雖然中間我都有升過職,但係做親都係細公司,升同唔升都係得我一個做,直接under老闆,其實無咩意思,頂多都係請過啲實習生或者part-time幫我手,做幾個月就走果啲,直至去到而家呢間公司,先真真正正俾我請個全職幫手。

新同事叫Candy,細細粒、長頭髮、斯斯文文,老老實實第一次做人上司,其實都有啲壓力,無人天生識做一個好上司,亦無人會教你點做,我唯有諗返以往我遇過嘅上司,做得好就學,做得衰就盡量避免,始終我都做過咁多年細,我估用同理心應該就知道點做好啲。

正所謂「雞髀打人牙骹軟」,第一樣要做嘅就梗係請佢食welcome lunch啦,我以前做過好多間公司,都唔係間間有得食,先唔理請唔請佢食飯,至少都要介紹下其他同事畀佢認識,第一日返工lunch無人理好慘㗎,我到而家都會久唔久請佢食飯或者飲廢水,唔係好多錢,最緊要大家開心。

轉新工要重新適應環境、同事、工作內容,講真請人唔難,但要請個有經驗幫到手又唔超budget嘅正常人其實好難,所以我都好驚佢做幾日就走,平時我都會對佢給予適量關心,例如問佢:「我俾你啲task處理到嘛?唔識隨時問我呀。」除咗工作嘅嘢,食飯都會同佢吹吓水,平時去邊玩呀,有咩興趣呀,乜都傾一餐,諗諗吓好彩係請咗個妹妹唔係小鮮肉,唔係有人應該會呷醋。

呢度都頂咗好耐先肯請人,啲嘢已經堆積如山,忙到甩轆,仲要抽時間教佢係有啲難度,但我覺得要畀清晰嘅工作指示真係好重要,以前試過有啲上司都未諗清楚自己想點就叫我做,來回做咗好多次都唔啱佢心水,嘥晒啲時間,一係就last minute先掉啲好急嘅job過嚟,搞到我要加班,其實唔講清楚,個細一係就好多問題問返你,一係佢就唔敢再煩你然後做錯晒,到頭來係會仲大鑊。

以前我好怕啲上司好多疑,例如見到我㩒電話就覺得我偷懶,但可能我係同agency WhatsApp緊,況且成日流流長,㩒幾下電話都好正常啫,又或者我whf就成日check住我進度,搞到好精神緊張。其實我覺得好簡單,我畀咗嘢你做,有埋timeline,你準時交到功課畀我就得,都咁大個人啦,要有適當自由度。

「話咁快就做咗一個月,習唔習慣呀?🥰」我說。
「都OK呀,開始上手,希望我可以幫輕到你。🙈」Candy說,然後中女心已經溶咗。
「你已經幫輕咗好多喇。👍」我說。
「但我成日做錯嘢,又係咁煩你問你問題。🥺」Candy說。
「慢慢嚟啦,熟咗就愈做愈快,準時收工啦,拜拜。」我說。

 

P.S. 阿奇:「你唔覺得Candy咁講好假咩?」我話:「唔覺喎,我覺得佢好真誠!」阿奇:「😂」

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 「𠒇」字係咩嚟?——港姐冠軍帶出嘅哲學問題 by 散彈一號
    試想象下,喺未有電腦嘅年代,如果你見到某張手寫嘅form上面,有人寫自己個名係「陳曼𠒇」咁啦。你會唔會即刻覺得自己唔識讀呢隻字,即刻走去查字典睇下個字點讀? 應該唔會掛。你第一個反應,可能會心諗:「嘩,呢個人寫個『兒』字寫得咁樣衰嘅。」…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 解構精神心理治療——輔導個案概念化(Case conceptualization) by 西多士
    如果問大家對「輔導」一詞想起甚麼?可能會聯想到精神疾病,情緒困擾,婚姻問題,家庭暴力等。其實,「輔導」並不如有些人想得這般負面的。先說說「輔導心理學(counselling_psychology)」吧。!它是「應用心理學(applied_p…
歡迎讚好我們的facebook page,免費資訊源源送上。

文章資訊

ID: 224087
Date: 2022-08-29 23:03:47
Generated at: 2022-12-02 16:33:56
Permalink: https://www.vjmedia.com.hk/articles/2022/08/29/224087/點先係好上司?