《明日戰記》其實係沒明日的戰記

1)我會話以爽片角度睇，《明日戰記》係好睇。最大賣點嘅特技係合格，即使未去到2022年水平，都有2015年水平，除咗開頭空戰部隊基地嘅摳圖（即係睇得出有key嘅痕跡）比較礙眼之外，其餘都順眼，尤其隻怪嘅設計同detail係有水準。

2)老實講開場用讀白交代已經有啲尷，到之後嗰段轟炸戲真係一額汗，但入到醫院終於進入狀態，空間同氣氛營造係出色，之後接住去倒塌大樓搵子彈同追逐戰都係上乘，導演吳炫輝應記一功。狹小空間動作戲設計依然係港產片強項，但宏大戰爭場面嘅調度，剪接就真係經驗問題，亦都唔係用錢可以解決得到。

3)劇本，我打個比喻，《明日戰記》好似一份未答完嘅試卷，呢題又答下，嗰題又答下，你會見到佢好努力完成份卷，但空咗冇答嘅問題仲有好多。你話佢錯咩，佢又唔係，因為佢根本未答完，你唔知點畀分好，所以嗰啲甚麼對白尷尬都係小問題，大框架都係要靠觀眾腦補講經咩。

4)以依家嘅《明日戰記》睇，佢就好似一部3集嘅Netflix影集最後一集，中間有好多窿窿由前兩集交代，最後一集就係大戰。如果呢個project一開始係分成上下兩集去拍，效果相信會好好多。咁當然呢個牽涉成本問題，同埋冇人敢保證上集出完，仲有人想睇下集，如果上集已經仆，個氹足以令古生嘅影壇大亨夢徹底粉碎。

5)英雄片類型，但係中間竟然冇人「領便當」呢件事真係unbelievable（首先我唔信劉青雲會死，我亦相信冇觀眾會信）。現有劇情嚟講，光仔根本就係領便當嘅完美人設（傻更更但係善良，而且有條女），但呢個99%會出現嘅橋段竟然出現1%嘅反轉，我都唔知可唔可以話係編劇扭橋。

6)其中一個對《明日戰記》失望嘅位係空戰部隊嘅團隊竟然冇熟面孔，古生家下簽咁多後生仔，胡子彤同朱鑑然就坐喺總部做啲npc角色，明明呢啲位係捧新人嘅超好時機。假想一下，換個locker落下做光仔，如果領埋個便當，迴響肯定仲勁過一班主角。咁呢個就返去劇本到，因為劇本連一班主角都未寫好，仲點分筆墨落配角。

7)主角之中，以李昇個角色最吸引人（雖然渣渣輝只係友情客串）。會想令人了解呢個人點解要用政治生涯／甚至條命押落去天幕，背後有咩，或者經歷過啲咩驅使佢咁做，角色嗰可塑性好大。甚至佢同譚冰之間有咩政治鬥爭，呢個計劃係咪一開始就係總部諗住收李昇皮多過打怪，所以我提議拍李昇外傳多過下集。

8)我會話《明日戰記》其實係離地戰記，依家呢個故仔冇展現到嗰世界觀，B16同成班人係割裂，所以劇情講要死幾多萬人觀眾都係會冇感。喺畫面睇到其實B16區高樓大廈係非常密集，同埋中間有一堵圍牆分隔開，箇中原因係因為潘朵拉出現令旺區荒廢，定係因為戰爭連連搞成咁，冇人知。呢個係遺憾，真心浪費咗啲用心build up嘅畫面，如果變成影集，呢啲設定係咪可以出返嚟呢？

9)我會話《明日戰記》其實都係沒明日的戰記。兩大主角開口埋口都要死，都係諗住去捐驅，甚至連同兄弟鬧翻都係因為對方怕死，呢氛圍貫穿成部戲。決心做烈士嘅人會講「一定要行落去」，覺得自己冇明日嘅人去為其他人謀求明日嘅幸福，呢種氣氛係咪有啲似曾相識？呢種求死大於求生嘅態度，某程度都係呢幾年香港社會嘅情緒投射，「送死嘅嘢等我做」更令人傷感。

10)《明日戰記》究竟有冇香港影子？我搵到兩個位，第一係母體所在嘅中央廣場，場景設定係中環畢打街。第二，當劉青雲搵到母體，然後執起基因子彈奮力掟過去，語帶憤怒講一句「仆街喇李昇」。呢個場面，我見過，我相信你都見過，共勉之。

作者：阿享

一個戒緊牛肉，但打邊爐仍然會忍唔住既耶青。

閱讀後覺得好，請多多讚好及分享～：）