咦？阿奇打過嚟兩次喎，miss咗，打返去先！無人聽嘅？唔通佢唔小心㩒錯制？無幾耐佢又打嚟…
「喂？喂？」我說，但係另一邊無聲，跟住仲cut埋線，佢明明揸緊車㗎喎，點解會打嚟嘅？我驚佢唔知有咩事，所以又打返畀佢，第一次無人聽，第二次終於接通。
「喂？你做咩事呀？」我說，另一邊今次只係有啲好微弱嘅雜聲，然後過咗一陣，又cut咗線，可能細個睇得電視劇多，好多撞車情節即刻浮晒出嚟，即係架車反咗困咗喺車郁唔到，漏緊油除時爆炸果隻，唔通佢係打嚟求救！？唔好嚇我呀大佬，就喺我不知所措嘅時候，佢就send咗個msg嚟話：「唔好意思呀喺架車度執緊嘢，啱啱先睇到原來㩒錯打咗畀你。」
唔知係咪坐佢車見過太多人亂咁揸車，我成日覺得喺香港揸車好危險，近呢幾年交通意外又好似愈來愈多，就算你揸得好小心，但你都控制唔到其他人點揸，路面上係會有好多突發嘢，例如前面架車無啦啦急剎、隔離線嘅車唔打燈突然cut埋嚟、實線都照cut、到你打燈想cut線人地就即刻比油衝上嚟、大車開到過晒線、車路無啦啦有行人衝出嚟等等，可能我唔識揸車見到咁就覺得好危險，成日要執生考反應，放心為咗大家嘅人身安全，我暫時都無打算學。
除咗坐車嘅時候會驚有意外發生之外，其實平時行街，如果喺啲車後面行過，條路又窄嘅話，我都會諗佢會唔會突然倒車夾到我，如果喺大貨車前面行過，會唔會有盲點佢睇唔到我開車撞到，係好低能，但係行過果刻總係會有呢個諗法，起初我以為淨係我先有咁奇怪嘅諗法，後來同朋友傾開，原來佢都會咁諗，仲比我嚴重，於是佢就走去睇臨床心理學家，然後個醫生就用以下嘅例子去同佢分析。
假設你喺行人路上面行，然後你諗架車會唔會剷上嚟車到自己，咁你就要問自己：「架車有無開到左搖右擺先？車速快唔快？條路係咪好窄？呢度係咪交通黑點？要用理性去分析你擔心緊嘅事會發生嘅機率，然後你就會發現其實只係自己過份擔心，杞人憂天啫。」用呢個例子嚟講當然可以好輕易話：「唓，好明顯係諗多咗啫！」但其實套用返喺生活上或者工作上，可能某啲事你都會過份擔心或者緊張咗，煩惱咗成日，分分鐘最後直情係無發生，但無形中畀咗自己好多壓力，不過當局者迷，難免有時會鑽咗牛角尖，呢啲時候就要理性啲去分析，唔好畀感覺控制住，講梗係簡單，都係要靠自己慢慢去調節心理同實踐。
做人最緊要開心，對自己好啲，食下好西，有時諗咁多都無用，早啲抖，聽日準時返工啦！
【遊戲新聞】Bug 助你速通拿S+ 《生化危機 4 重製版》狙擊槍土遁大法輕鬆越過鎖上的門
當女朋友仲鹹濕過自己
Pokémon朱/紫！發掘古代，超越未來！訓練員進入開放世界！
女神新標準出爐！毒燃唔可以唔識嘅5位隱藏版女神MULCE
我在孤獨中找到了快樂
真正愛對方，唔好晚晚傾電話
2022年9月8日
