打工仔都有私隱㗎大佬！

公司最鍾意開會，久唔久就十幾條友坐埋一齊，有齊唔同部門，唔關事嘅嘢都要聽一大輪，嘥晒啲時間，話說我地開會有時會將電腦駁落投映機，大家一齊睇下啲相或者係文件，然後經理話佢電腦無電，借我部電腦用住先，本來一直都相安無事…

「我WhatsApp send咗張相畀你，你而家開嚟畀大家睇。」經理Matt說。
「等等，我forward去email度。」我說。
「唔使啦，你開WhatsApp web咪得。」Matt說。
「駁緊projector喎，WhatsApp好私隱。」我說。
「而家又唔係睇你啲對話，定你有嘢收收埋埋唔見得人？」Matt說。
「呢個唔係公司電話喎，係我私人電話。」我說。
「得啦得啦，而家個個唔好望projector，你開啦。」Matt說。

有用過WhatsApp web嘅都知，一開出嚟就會睇到晒所有人同你對話嘅最後一句嘢，而你一開出嚟，阿豬阿狗都一定會望下，我而家打份工啫，contract無寫明要將私隱嘢放出嚟畀人睇㗎喎，可能你話人哋又唔係特登睇你啲嘢，但你係永遠唔知邊個八公八婆會將呢啲成為佢茶餘飯後嘅話題。

唔係個個人都咁著重私隱，我另一個同事Kenji佢就完全無所謂，有好多次佢都直接開個WhatsApp出嚟比大家任睇，仲要碌啲對話喺度搵相，所以其他同事同佢嘅對話都畀老闆睇到晒，咁好彩大家都好醒目唔會喺WhatsApp講人壞話，同埋佢自己啲私人相又係放晒出嚟任睇。

同事間閒聊吹水總有，但係呢個經理梗係好鍾意問私人嘢問到好深入，問同事點解離婚啦，有無搵新男朋友啦，呢個年紀係咪好難搵另一半，又問我有無去男朋友度瞓啦，我心諗關你鬼事咩！又唔識睇人面識，人地都話唔方便講咁多，佢仲追問，令到啲同事好尷尬都唔收口，仲要聽完周圍講，不過因為佢係經理，所以大家都唯有hea答唔敢黑佢面。我懷疑佢喺屋企係無人同佢傾計，所以佢返到公司係咁捉人傾計。

我覺得同事間都應該互相尊重，吹水當然可以，但人地唔想講就唔好逼人啦，咁樣唔係叫關心下屬呀大佬，會令人有種無形壓力㗎，對付呢啲人最好就係hea答或亂答，有時間就同佢鬥吹，無時間就話好忙，要趕嘢畀老闆，唔好浪費時間喺呢啲人度。幾時都話，返工最難處理嘅都係人事，唔係工作。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）