中咗Covid，我終於可以休息

「你好似仲有成十幾日假要清喎，仲唔放？」HR同事Mandy說。

「忙到隻狗咁點放，放完返嚟仲死。」我說。

「唔係請多咗個人喇咩？」Mandy說。

「就係因為請咗人，啲workload幾倍咁上，deadline又縮短晒，啲嘢仲急過以前，痴L線！」我說。

「既然啲嘢永遠都做唔完，咪請假抖吓囉，你唔放假都做唔晒㗎啦。」Mandy說。
「得閒死唔得閒病，再講。」我說。

以前都試過幾次呢種情況，就係喺最忙最忙嘅時候，身體會同你講係時候要停要休息，就算你堅持做落去，最後都會局住你要停，一係就M痛到又痾又嘔返唔到公司，一係就發高燒，今次勁呀，出動到Covid，起碼都七日。雖然唔係所有嘢即停，都要handover畀唔同嘅同事，盡量唔好令大家執咁多屎，初初都仲想wfh，然後啲病徵就狗衝出嚟，喉嚨痛、咳、發燒、頭痛、肚痛、胃痛，咩都出齊，好啦咁我都係去瞓覺。

好神奇嘅係平時好少人打電話嚟，但係同事開始知道我中咗之後就一日收幾個電話，關心嘅說話當然有，但重點都係公事，好心急就一早搵我啦，唔急就唔好而家搵我啦，激死。其實我都已經「盡量」放低工作，每日係咁灌水同休息，希望快啲好返，雖然話要休息多啲，但係瞓得多又會搞到夜晚失眠，所以都係要搵啲嘢做下。

喺生活節奏咁急嘅地方，可以有幾日時間靜靜地喺房諗下自己到底想做咩其實真係幾正，至少我有返時間寫文，然後我發覺好耐無同過自己講嘢，問下自己最近過得開唔開心，睇返2022嘅目標，原來自己只係做咗好少，但係唔緊要，2023再做囉，唔使逼到自己咁緊，我覺得自己今年已經夠努力，做得好好了。

「休息是為了走更遠的路」，雖然句嘢好老土，但係有佢嘅意義喺度，有時工作係會令人做到麻木咗，畀咗好多無形嘅壓力自己，不斷消耗身心，係愛定係責任？我諗多數係因為窮，但係睇返自己人工，值唔值得咁樣消耗生命值先？扣血扣到就死喇喎大佬，係時候要醒醒，唔係話完全躺平，但至少唔好做到過晒火，人嚟㗎咋，唔係機械人呀。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）