屯門「季季紅風味酒家」涉嫌違反信用卡公司規定

（於openrice 的商戶資料截圖）

（網頁備份）

根據 Visa Rule 1.5.5.1 條，以及MasterCard Rule 5.12.3 條，Visa 同埋MasterCard 嘅付款渠道都唔能夠設立最低消費。

一直以來，我哋其實都接唔少市民投訴，我哋facebook嘅PM 都經常收到對於商戶違規嘅投訴，咁如果幫到佢哋，我哋多數都會協助處理嘅。

面對著商戶違規嘅話，要為商戶嘅違規行為去作出投訴又係比較困難嘅，因為要作出投訴必須要向負責商戶收款嘅收款代理或者Visa／MasterCard （下稱 V / MC ）作出投訴，但係投訴過程就真係可以好煩，因為有啲收款代理完全唔會理任何違規投訴。我想感謝有部份收款代理真係會好認真處理我哋嘅投訴，但係有啲直頭係完全唔理，而向V / MC 其中一個作出投訴嘅時候係直接拋咗個波俾收款代理，而另一間就以前會覆，而家唔知點解無回覆。

咁既然投訴咁麻煩，好多時都接近處理唔到，我哋可以點做？經過咁耐嘅經驗所得，如果商戶使用嘅收款代理係會處理投訴電郵的話，我哋會直接搵該收款代理處理，但係面對住已經知道商戶嘅收款代理，而明知該收款代理係會無視投訴，我哋搵到一個新嘅處理方法，就係「電子支付違規關注組」直接打俾商戶查詢，通常啲商戶聽到「電子支付違規關注組」呢個名，就算唔識我哋都好，我哋溝通了解完之後，最後嘅結果都係，最低消費呢條規矩會消失咗。咁都係解決咗個問題啊。但係以下就有單非常難搞嘅商戶，態度仲非常頑劣，我哋完全處理唔到，唯有公開問下咩事。

早排接到一個投訴係指向一間大型酒樓集團「季季紅風味酒家」話佢涉嫌違規，為 Visa／MasterCard 付款渠道設立咗最低消費額$ 200 先至可以使用。當我哋去處理投訴個陣，就開始著手搵下佢係用邊間收款代理，而我哋係發現佢用緊嘅收款代理係唔會處理投訴，唯有由「電子支付違規關注組」打電話問下有無違規啦。

首先要講下一啲關於呢個投訴嘅資料先，投訴人向我哋講，就話商戶（季季紅風味酒家）違規設立最低消費，投訴人係一度有企硬同收銀處職員嘈過佢哋違規嘅，而收銀處嘅職員係話「（最低消費）呢條規矩係寫字樓定架，唔好難為我哋啦」，咁之後投訴人無再嘈落去，繼而向我哋作出投訴。

基於我哋認為商戶嘅收款代理未必會處理投訴電郵，只好由「電子支付違規關注組」打電話問下，我哋就打過去寫字樓問，以下係我哋嘅對話。（電話內容重點部分節錄）（節錄大概內容，唔係電話對話嘅exact word）

季季紅（下稱季）

電子支付違規關注組（下稱電）

季：你好，季季紅

電：你好啊，我哋係電子支付違規關注組打嚟架

季：係，有咩事呢？

電：我哋早前收到個投訴，話你哋涉嫌違反……（都係重複我上面寫嘅嘢）

季：係咩？有啲咁嘅事？首先我哋寫字樓唔係幾清楚分店有用咩收款喎

（啊姐，收銀處嗰個職員話寫字樓定規矩喎，你哋唔知有咩收款渠道？）

電：你哋有收 Visa／MasterCard 喎，點解你哋……（都係釐清條問題）

呢度中間啲對話都係同商戶釐清返啲基本嘢，唔詳細覆述啦，但係之後有啲對話係令我哋跌咗響度咁滯

電：咁你哋係咪違規為 Visa／MasterCard 付款渠道設立最低消費啊？

季：咁佢要俾幾錢先？

電：十幾蚊

季：咁咪係囉， Visa／MasterCard 嘅手續費係邊個俾先？

（又話寫字樓唔知分店有咩付款渠道）

電：咁有冇手續費我哋毋須要理啊。

季：咁你都可以用其他付款渠道㗎嘛？

電：你哋係咪違規先？

季：咁我哋都要了解清楚先，我哋唔清楚有無違規…… （一大堆諗住帶我哋遊花園嘅藝術對話）

電：你哋會唔會撤回呢條規則？

季：嘩，你哋咁惡嘅，一打嚟就話要人哋撤回規則，都要比我哋……

（又係一大堆諗住帶我哋遊花園嘅藝術對話，今次加埋賣慘）

電：Visa／MasterCard 一直都有呢條規矩，你哋無得扮唔知架

季：咁你都唔係一打嚟就話要人撤回…… （再次賣慘）

電：咁我哋直接搵收款代理去處理？

季：咁惡嘅，一嚟就要（又再次賣慘）

（然後又係一大輪賣慘言論）

電話最後係我哋主動收線，因為商戶死性不改，犯規仲大大聲，兼瘋狂遊花園，重要賣慘，真係好難頂。

我哋表示對於呢個商戶嘅違規行為我哋處理唔到，本身諗住搵收款代理跟進，無諗住寫呢篇嘢，但係商戶態度係前所未有咁惡劣，唯有咁樣作出公開查詢。

講開又講，一直以嚟我哋態度都比人話非常強硬，對商戶毫不客氣，我哋嘅回覆係，如果我哋溫柔嘅話，比機會你食住我哋啊？公然違規重要咁大聲？冇嘢啊？對於違規行為仲想有機會，有時間或者有空間俾你去作出修改？我哋只會最後問你一句，而家會唔會立即撤回？唔會嘅話，我哋唯有直接去搵收款代理處理。

PS：當我哋調查佢用邊間收款代理嘅時候，就發現佢哋嘅收款代理異常複雜，我哋表示好少見到咁嘅情況，要時間處理，而一開始就可以話，商戶使用嘅收款代理唔會覆電郵，係因為只有少數收款代理會覆我哋電郵，其他一概唔會覆，呢個商戶唔係用個啲會覆我哋投訴電郵嘅收款代理，所以先話唔覺得會覆投訴電郵。

*收款代理係指一啲公司為商戶提供Visa／MasterCard 收款服務，Visa／MasterCard 無直接向商戶提供商戶收款服務，如果商戶要為自己旗下店舖提供Visa／MasterCard收款渠道，就係要搵呢啲收款代理嘅公司。

作者：電子支付違規關注組

閱讀後覺得好，請多多讚好及分享～：）