《季前賽》：捉到鹿唔識脫角

本來對季前賽好大期望，因為一班男演員都懂得打籃球，運動劇可以拍得好熱血好精彩，加上一眾青春偶像簡直無得輸。

但問題就係睇到依家，我發覺最大漏洞係高家孝加河馬呢一對。關於佢地嘅情節只能用不知所謂黎形容，唔好笑又胡鬧，點解會寫出呢啲情節？最慘係佢地嘅篇幅係太多，多到我唔想見到高家孝出場，事關見到佢就見到河馬，真係拖慢曬成套劇嘅節奏，有佢地出場，就係廁所時間，但明明我係鍾意睇姜濤嘅，只係唔鍾意佢嗰部份好多時好似買豬肉搭豬骨咁，我一定要被逼睇埋yoyo！！

捉到鹿唔識脫角就係呢種。明明講籃球就已經成件事好圓滿，你要講籃球以外嘅劇情係無問題，講阿德父子情姐弟情，講光仔點樣從籃球場搵到自己second chance ，講阿良同個女點相處，講阿孝同老闆仔同阿媽嘅關係，其實已經好豐富，但可惜呢啲篇幅都係好短，非籃球劇情入面最多係講河馬如何花痴，真係好浪費！我睇到第七集，連Ian叫卓立峰都要問人，可想而知Ian 好似係友情客串咁款。我到依家都唔知Ian做乜，但明明睇宣傳海報卓立峰同高家孝係雙頭馬吖嘛，點解見唔到卓立峰，反而成日見到Yoyo??!!!

成套劇一講返籃球或痴漢隊各人本來係好好睇嘅，但一去到河馬部分就真係好似睇緊另一啲野，格格不入，唔知點解要咁做，係咪viu 想捧yoyo?? 如果係咁，我覺得viu 係害左佢。因為佢個角色不但唔吸引，反而係討人厭。演唔到少女心事嘅忐忑，擠眉弄眼當係可愛亦令人難受。佢需要嘅係機會，但機會唔係咁俾，都要考慮成套劇同佢夾唔夾，揠苗助長有咩後果？

套劇有十五集，依家去到第七集俾到我以上嘅感覺，我希望劇嘅後半部可以重回正軌，力挽狂瀾，否則我會覺得好可惜，因為搵到呢個陣容拍劇係好唔容易，真心希望唔好畫虎不成反類犬。

作者：無名

閱讀後覺得好，請多多讚好及分享～：）