其實響香港係無理由阻止到人做啲不太合乎社會道德倫理嘅工作

（職業殺手示意圖）

如果你識得有人係做緊啲唔太合乎社會道德倫理嘅工作，其實你根本無任何理由叫佢唔好做。

先帶大家睇下一個調查，根據求職平台CTgoodjobs 所做嘅《2022年畢業生薪酬及就業調查》結果顯示，7成僱主願聘請畢業生，平均支付月薪港幣16,457元，而畢業生期望平均月薪為20,749元，雙方期望落差超過4000元。

2022年僱主願意支付俾畢業生嘅人工平均月薪係$16,457？我哋先返去2001年睇下，根據香港大學[統計]指出，2001年香港大學畢業生平均月薪為$16,152，你可能會諗，嘩～！畢業生人工過去20年都無加過？sorry 阿，仲未計通脹調整阿，即係呢20年其實一直減緊畢業生人工啊。

表示睇唔明啲咁複雜嘅經濟字眼？我哋可以轉個講法。

假設2001年一個茶餐廳嘅午餐A 賣緊$22 蚊，以2001年平均月薪$16,152 嚟計，呢份人工每個月可以買到734 個午餐A，到咗2022年茶餐廳嘅午餐A 賣緊$50 蚊，用平均月薪係$16,457 嚟計，你只能夠買到329 個午餐A阿，足足少咗405 個午餐A 啊，嘩～！每個月人工減到冇咗超過一年嘅午餐A 啊，一年少咗4860 個午餐A 啊。

2001年期畢業生人工，加埋呢20年嘅通脹（2002年至2021年期通脹數字），以今日嘅角度去睇返2001年嘅人工月薪應該係$22370，唔計通脹，畢業生嘅人工都無加過，重要少咗，計埋通漲，係直頭減緊人工阿，名義工資接近無加過，何況實際工資減得好勁。

黃子華話，嚴格上黎講，你每個月底給俾我嘅唔係糧，而係賠償。某程度上又真係冇講錯喎，你返工真係做嘢咩？被人屌嘅賠償嚟架咋，我明真係會有照顧下屬嘅好上司，好老細，好公司嘅，但係遇著啲無良上司，老細或者啲無良公司，你咪被佢日日係咁屌，或者你係做服務行業，就被客屌。份賠償a.k.a 實際人工咁多年一直係咁減，但係咁多年都係要被人屌，你返辦公室工作，或者做服務性行業，一下就企響度俾人屌，一下就坐響度俾人屌，如果你老細屌你個陣隻手揸住個file，隨時講講下扯火就唔小心掉咗落你身上，你會受傷架喎。

講下啲企響度或者坐響度會被人屌嘅工作，唔好講啲要求學歷嘅嗰啲工作先，就講做譚仔侍應，根據[公開嘅資料]譚仔侍應月薪介乎$16,000 – $17,000，仲未計營業獎金，表現獎金同埋勤工獎金，咁樣睇落做譚仔侍應好似好過啲需要學歷嘅寫字樓工？連學歷都唔需要，但係人工差唔多。但係唔好漏咗，做飲食業，佢仲會包埋你個午餐A 啊，根據譚仔國際年報顯示，譚仔顧客人均消費為$59.7，即係你返26日譚仔侍應，譚仔仲包你總值$1552.2 嘅午餐A 啊，仲要冇OT，一份要學歷嘅寫字樓工，你每一返工仲要自己出錢買份午餐A，你返完26日工扣埋份午餐A 實際得返$14,000 左右，你付出咗你份學歷，加上啲扮嘢成分勁重嘅OT，重要自己出錢買份午餐A？呢份需要學歷，演技同埋要你付出你份午餐A 嘅工作帶俾你嘅賠償得$16,457？需要學歷嘅工作竟然賠償金額同無需學歷嘅工作一樣？點都講都唔通啦。

對比返需要學歷嘅寫字樓份人工，2022年都仲係 $16,457 直頭侮辱添啦。有冇人可以提出理據阻止人做唔太合乎社會道德倫理嘅工作？我真係搵唔到。

作者：外賣仔

閱讀後覺得好，請多多讚好及分享～：）