中期翻新列車榮休

#東鐵綫過海段 即將通車，隨新車廂及新訊號系統投入服務一年多，「中期翻新列車」都將會榮休

Credits : Gordon Wong

「中期翻新列車」前身係第一代電氣化火車，由 1982 年起服務新界東乘客往返市區，設計時每列車係 3 卡一組，可以組成 3 卡、6 卡、9 卡、12 卡列車

初時屬「3094 批次」嘅車廂，由九廣鐵路局於 1978 年斥資購買，與今日港鐵市區綫「現代化列車」，一同於英國鐵道車輛製造商 Metro-Cammell 位於伯明瀚的廠房生產

港鐵車隊

「3094 批次」嘅車廂同當地嘅近郊火車一樣需要司機（Driver）及列車長（Train Guard）一同控制，部分屬於近郊型（Inner-suburban），亦有部分屬（Outer-suburban），遠郊型車上只有部分範圍屬頭等，並設有洗手間，不過就針對香港過境嘅人流而有行李卡間隔；而近郊型則只有普通等車廂

未幾，不少人口遷入新界東，各個新市鎮算係平均分佈於九廣鐵路沿綫，全程車亦只係三十幾分鐘，像當時英國一樣要分開 3 卡車、6 卡車服務範圍嘅模式，明顯唔適合香港

再者，如果安排 6 卡車只服務紅磡至沙田，3 卡列車則服務沙田至羅湖，列車往往要喺沙田站勾接或分拆，而過程要人手接駁列車嘅剎車風喉等，亦會無謂增加往大埔、北區乘客的車程時間

因此後來喺地下鐵路九龍灣車廠組裝嘅「K03、K05 批次」車廂，就已設計成每列 6 卡車的組合，方便組成 9 卡或 12 卡列車，或讓餘下嘅 3 卡車成為只來往沙田至馬場嘅穿梭列車

車廂都取消咗洗手間、行李架、部分座位，但每個長 23 米嘅車廂每邊只有三對車門，確實妨礙上落車人流，亦令乘客只聚集於車門通道，結果每次列車埋站都要打開車門長達分幾鐘時間，方可以讓遠離車門嘅乘客上落車，確實未能配合 80 年代尾、90 年代初新界嘅人口增長

所以喺 1996 年九鐵批出合約，將所有電動列車重組為 29 列 12 卡車，是次工程會改為五道車門、拆除列車中間第 3、4 、6、7、9、10 卡多餘嘅駕駛室亦補強車體結構，並翻新車內裝潢，在增加載客量同時加設多用途空間、電子顯示牌及凸字金屬牌，成為本港最早嘅無障礙交通之一

「中期翻新列車」分別喺 1998 年及 2002 年改用咗唔同嘅行車訊號，再轉為自動行車。之後，車門又陸續改為電動操作，避免有乘客衝入車廂而個人物品被夾到後，需要車長重開全車 56 對車門，而改為受影響嘅個別車門會自動重開，使列車開行時可以暢順啲，東鐵綫喺繁忙時間可開出嘅班次，就會有稍稍增加嘅空間

近年，車內又新增咗車廂電視、座位嘅編排稍有改動，配合唔同時代乘客嘅需要

但多年過去，列車嘅性能同最新嘅車廂有別，而車門分佈始終未臻完善，令乘客未能有效利用車廂空間，大家嘅候車嘅時間仍然好難縮短，影響將來東鐵綫嘅運力

另一方面，會展、金鐘站新建部分因需遷就鄰近建築物，而無辦法容納 12 卡車廂，所以「中期翻新列車」亦係時候完成其歷史使命，將重任交俾全新嘅「東鐵綫現代列車」 🫡

新列車每卡車廂比以前容納嘅乘客更加多，配合新訊號系統，將來可以用更頻密嘅班次，超越目前東鐵綫嘅運力，接載往返港、九、新界嘅人流

作者：MTR Service Update

數碼媒體平台上影子的鐵路公司溝通渠道， 專注於乘客資訊的工作，目的為示範公共事業之應有水準，服務範圍 ➡️ metroride.hk/ServiceScope

閱讀後覺得好，請多多讚好及分享～：）