@Jacky Chan
Jacky Chan
貿易行文員,同成龍一樣,唔打得又唔睇得

論希臘羅馬公民身份

就算喺西方,公民嘅概念都經過唔少轉變。以下就簡介希臘同羅馬嘅公民身份概念,順便以馬後炮角度講解一下當年嘅概念帶嚟乜嘢後果。至於借古鑑今?well,冇話唔得嘅,但係咁,如果想做真正公民,麻煩先幫香港解殖,因爲殖民地蟻民喺政治上根本冇權話事,冇得參與話事過程就唔係公民,完。

羅馬共和國政治制度嘅特色,在於實權並唔係喺元首或者官員,而係喺各類會議入面,而當中實權最大、地位最高嘅,莫過於元老院。元老院可以負責派遣及接待外國使者,指派官員去管理公共土地,包括埋頭先講嘅資深執政官負責嘅地區,指揮軍隊以及分配公共資金。而最重要嘅係,可以提供法律建議,然後由羅馬平民大會通過執行。簡單嚟講,元老院就係身兼而家歐美嘅內閣同埋上議院/參議院,各位立法會議員,很想要吧。