佔領應否打牌打波打邊爐，成為大家拗餐飽分左右嘅課題。我冇去現場，冇份投票。只係，佔領同送殯、觀禮一樣，只要勿忘初衷，做嘅嘢自然合宜。只有當注意力從先人、新人等主體轉移去自己嘅信仰、對身外物嘅介懷同埋聲色犬馬嘅沉迷，先會偏離原委，先會令人覺得唔知點。
從北京到香港，喺今次佔領行動/革命入面，都有鷹鴿角力，檯底嘅對話同談判大家睇唔到，但面嗰浸就係有人唔想有空間談判，有人想留位談判。唔談判嘅就攬炒，談判就用時間再換空間改變。我唔 buy 佔中三恥，但目前，我贊成開路畀公務員返工。
村民好現實，剎那激情之後，磨爛蓆都唔係辦法。唔好令到民意背向。迫到政府埋檯已經係比想像中好嘅結果（政府繼續不聞不問等你民氣退燒都得），而家應該集中留意學聯談判到啲乜，對政改諮詢帶來咩改變。如果係公開討論，市民發現政府根本冇誠意埋檯傾，可以再將行動升級。如果係閉門討論，學聯要將訴求同討價還價過程清楚交代，民主黨前車可鑑。
適逢今晚旺角咁橋冇咩差人叔叔又咁啱有好多流言叫人速離旺角，然後仲有架Ben屎成個保齡球咁衝埋示威人群入面。好在示威者唔係樽，有腳曉走啫。呢個世界，好少可咁多巧合一齊發生嘅，點樣見招拆招，就靠大家提高警覺，用下commonsense思考消息真偽，大家互相包抄提點，唔好單獨行事，係咁架啦，邊有得讀書學返嚟架。
苦澀，慢慢向著心裡滲。場波踢緊嗰陣，我知道香港防暴警察出動，對付手無寸鐵嘅示威者，用伸縮警棍、胡椒噴霧甚至，催淚彈。有人話睇見咁嘅場面好催淚，我只係個心好實，就好似上個禮拜曼聯領先三比一都可以反輸三比五咁。哇，咩世界。
物質上有形有色嘅嘢我都知道要放入垃圾桶，但意識上無可觸摸、只靠口耳相傳嘅嘢，例如話「請食飯去遊行」、「個別團體派錢示威咪將呢一百幾十個從大會統計數字中剔除」、「傳媒派出臥底偵查式採訪係插贓嫁禍」之類，大家非但唔會當係垃圾一笑置之，仲會廣泛流傳討論，唔好彩嘅就被潛移默化。呢種流氓都不如嘅無恥狡辯，最需要一個垃圾桶收集然後拎去堆填，無奈有人會話要捍衛佢哋嘅言論自由，或者應該針對衍生呢啲人嘅制度而唔係針對呢啲人。
警方稱有 11萬人從維園出發，未必非虛。網民瘋傳萬人空巷的場面，大多攝於崇光到鵝頸橋以後，遊行人士半途而廢、在銅鑼灣後巷更衣退出，並不影響警方「點人頭」。 大家要對我們的警隊公平一點，數一二三這麼基本的又怎可能搞錯？至於周融報稱有 19 萬 3 千人參與，其實都只是虛數一個，志在向在上者交代，至少明早《文匯》、《大公》等報章引用的數字都比較亮麗，較諸「七一遊行」警方點算 98,600 人多出整整一倍，足以耀武揚威。至於當中多少由同鄉會號召、幾多因為公司老闆「吹雞」出席，大家心知肚明。然後餘下的數萬人，其實大家要接受一個事實：香港的確有極端保守、真心支持共產黨在港依法施政的人們。
曼聯喺雲高爾治下首場正式比賽失利，歸根究底係球隊夏季大量流失主力後未能及時補充足夠人材，加上傷兵相當多，焗住限米煮限飯，如果勞克梳爾同拉菲爾 (或華倫西亞) 兩隻正宗翼衛在陣，又如果雲佩斯放完暑假，球隊表現應該可以好啲。雲高爾將艾殊利楊格改造成左翼衛係折衷方案，用蘭尼同贊奴沙複製拜仁錯腳翼鋒組合亦係冇辦法之中嘅選擇。問題係， 3-5-2 陣式要有一個中堅以自由人姿態引球出擊壓上助攻，但曼聯陣中完全冇呢種人材，令三中堅陣徒具其形而無實，兩邊翼衛要兼顧助守又要單騎邊線突圍又係苦差。用到費蘭尼中場中，相信亦只係畀佢最後一次機會去證明自己唔適合踢曼聯。
中東局勢繼續立立亂，「時事評論員」張翠容喺港台節目《左右紅藍綠》分析「伊斯蘭國」崛起，貫徹一個中心思想：「千錯萬錯，美國嘅錯」。點解有伊斯蘭國 (ISIS) 崛起？因為美國 2003 年攻打伊拉克，推翻薩達姆政權，狙擊遜尼派殘黨。然後翻舊帳翻到美國為咗拉攏庫爾德族對抗伊朗同利亞，搞到地緣政區不穩。至於今日嘅亂局，就係美伊戰爭嘅結果。如果觀眾照單全收，產生一面倒嘅反美思想絕對唔出奇。
上季英超冠軍曼城同足總盃盟主阿仙奴喺溫布萊球場相遇，兩隊都係寓賽於操，正選陣容相當生口面。主要嚟講，係新球員有得踢、後備球員有得踢、踢世界盃但早段出局嘅都有得踢。但係大牌正選就冇喇，唯有聚焦睇下新兵係咪對辦，好過冇。
香港好亂。但如果將眼光放遠少少，唔難發現中東比香港亂十倍。唔係講以巴衝突加火戰火，係講緊「伊拉克和黎凡特伊斯蘭國」 （簡稱 ISIS 或 ISIL）喺伊拉克長驅直進，攻油田、佔水壩，連黎巴嫩都受波及。冇人知道呢個奉行原教旨伊斯蘭教義嘅組織往後會做乜，但如果話佢哋想建立伊斯蘭世界……戰火會燒到幾遠？冇人知。會否只局限喺中東或西亞？我估未必。打到入歐洲甚或東南亞？邊個知。邊個制止到佢哋？唔會係奧巴馬。
一個真人真事，係唔存在嘅買家。一般賣家都唔會獨家放售，貪你嗰一百幾十蚊超市禮券有寶咩。咁放畀幾個代理，又會人多口雜，甲經紀聽到某個盤就快到價，想要攔途截劫但又要爭取時間，唯有虛構一啲「我個客」出嚟。呢個客，叫價永遠超乎你預期，但又永遠唔會出現，只會因為唔同原因而要遲啲嚟，例如屋企人病咗啦，例如心情唔好啦，例如喺街外聽到你個單位嘅負面傳聞啦。吹到盡，等你又 hold 住嗰個未到價嘅客，同行又發唔到市，總之雙輸三輸都在所不計。
政治有政治娛樂版，副刊有王迪詩帶起潮流。雖然已故的丘世文曾在《號外》雜誌以顧西蒙為筆名書寫《周日床上》 （而且好好睇） ，但論知名度、論爭議性，真係拍馬都追唔到王迪詩。一個單身貴族住喺蘭開夏道，以高姿態高角度寫盡金融中心眾生（外加類似《 Sex and the City》嘅情節），謎一般嘅身份令人遐想王小姐到底真有其人定係集體創作。當然，及至王迪詩 come out （！！）公開真人為楊潔深之後，謎底已經解開，原先嘅可塑性自然歸零。
返工其實係一種交易。放心，好符合道德、高主教唔會捉你嚟鞭屍嘅。交易，兩個字，一買一賣（喂用到爛喇）。 賣嘅係時間同精力，買嘅係金錢及金錢可以換來嘅一切物質享受，以及金錢無法量化嘅經驗。咁好簡單啦，你一開始未必知道自己想要啲咩經驗，但肯定自己想要錢。咁，返工，唔為錢，為乜？
有「江湖傳聞」指蔡東豪將會轉戰壹傳媒加盟《蘋果日報》，我只係想講，反建制嘅傳媒冇唔分裂嘅本錢。《蘋果日報》有其堅定支持者，亦有更多仇家打風打唔甩。《主場新聞》形象相對地中立，難得建立一班固定擁躉，而家一下子捨棄而期望佢哋直接轉賬到《蘋果日報》，就好似劉慧卿嫁入民主黨然後期望前綫支持者自動過戶咁不切實際。
以前我天真以為，維園阿伯總有百年歸老嘅一日，到時香港就應該有希望。但而家嘅亂象已經全盤否定我不切實際嘅幻想。 2011 年，愛護香港力量開始狙擊公民黨，就外傭居港權案窮追猛打，程度之激烈比起維園阿伯有過之而無不及。
