喺社會有大事件發生，政局動盪嘅時候，中共派人同各級幹部，各大機構高層「打招呼」，喺八九民運嘅時候都有大規模做過。表面係包裝得好靚的，表面上係中央向大家「解釋清楚」呢排發生咩事，之前大家唔清唔楚咁做左嘅嘢講過嘅嘢，中共可以覺得你係不知者不罪。
警方不斷咁聲稱激光筆嘅功率能帶來損害，我諗呢個不容置疑，但另一方面，世界衛生組織定義「健康」，係包括生理與心理健康。科研研究中，激光筆能為心智未成熟，即擺明要冒險嘗試望激光嘅青少年及細路，因為貪玩而唔眨眼同埋唔擰開，我不緊要問，經過多重體能測試及面試程序，及經多月訓練先出班嘅香港警察，有幾心智唔成熟，或者話，呢幫警察有幾痴線，當見到有人用激光筆意圖照射佢嘅時候，會特登睜開眼望到實一實，而為視網膜帶來損害？
聽日，我會照常咁生活，一定唔會去任何嘅所謂集會，去球場集會除左阻人打波，無人會覺得癱瘓左任何野。
我可能係去食飯行街，可能去坐下cafe 打下Switch 嘅《火焰之紋章。風花雪月》玩二週目，計劃中仲可能好多野做。如果聽日起，係起，唔係得聽日，為左五大訴求，香港真係有一場全港大罷工，喺林鄭政權妥協之前，我已經有曬心裡準備，我乜都唔洗做。
遊行嘅付出體力時間，呢啲都係好容易好快recover，但係被捕者及可能罪成者嘅青春、前途，延伸落去係生活質素開唔開心，仲有義士嘅生命，呢啲係無價，甚至係之後俾幾多野都追唔返。
付出咁多，換來嘅，只係林鄭由好撚串，變成而家喺鏡頭面前扮死狗道歉，坦白講，即係乜都無。
唔係話質疑大家嘅決心，而係你喺今日之前嘅，唔好多，一個月內，你做過啲乜準備迎戰警察？例如做運動之類，如果係無嘅話，其實對唔住，你贏嘅機會係 0 。而衝擊警察嘅示威者，作為一個群體，大家有無訓練過？有都唔講得，「團練」係犯法嘅，所以我都估大家係無，對唔住，你贏嘅機會係 0 。
上年六四前後，香港眾志好學唔學，學人搞細路女，搵啲後生女訪問，然後話佢地唔識六四，字裡行間就係「乜你咁渣架，睇下我地幾叻」云云，不過眾志都算係知錯能改，過左幾日都刪片兼道歉。
但係偏偏呢個懷疑叫羅惠儀嘅豬心記，佢就趁眾志條片仲喺度，就cap 人地圖，再大肆咁鞭笞兩個小妹妹，當然啦，佢話自己中立，話自己唔係特登貼人地個樣，話自己為歷史留返個紀錄所以唔會刪。
