腦細都係一如既往，諗到乜就叫你做乜，即叫即蒸，無時間畀你plan，往往都係好倉卒，只可以勉強交啲行貨出嚟，最慘係今日的我打倒昨日的我，幾個鐘內變一次，講過又唔認數，成日要我哋成班同事登上月球，但淨係畀架單車你，大佬呀點飛上去呀？除咗減人工，佢仲諗咗好多方法整走我哋，令到大家最近都好大壓力。
我都算係個機不離手嘅人，所以我通常都會好快覆人msg，除非忙緊、miss咗或者唔識覆，當然有時講無聊嘢都會已讀不回，朋友入面都有啲人係好似我咁覆得好快，有啲就時快時慢，有啲就勁耐先覆一次，甚至係經常已讀不回，但係唔覆嘅朋友其實都好熟，出嚟面對面都有大把嘢傾，只係平時真係少玩電話。
拍拖，話易唔易，話難唔難，老土啲講有時都幾睇緣份（講完都覺得自己好old school），當然都睇你係想認真拍，定係散拖都OK啦，但我覺得年紀大咗，考慮係會多咗，唔似得廿幾歲嗰陣，有feel就試咗先，唔得咪散，然後再搵過，因為每次試其實都好攰，要重新認識一個人同畀人去認識，相處嘅時候要互相遷就、磨合，需要好大耐性，當中有開心、有感動、有失望、有傷心，即使到頭來係提出分手嗰個，其實都需要時間去復原，總括嚟講就係「心很累」。
「Brenda，條片加返中英文字幕，然後再拍一條關於公司新嘅產品插入去，而家果條唔夠update呀。」Michael說。 「但係咁樣改條片會好貴，我哋又無條原片，不如直接刪咗唔update嗰啲頂住先，等有多啲新產品再拍。」我說。 「梗係唔得啦，你照我意思做啦！」Michael說。
其實減薪係好聰明嘅決定，因為你應承咗，之後炒你都賠少好多，至於點解唔繼續放無薪假？因為個個放晒假，咪無人比腦細點嚟做嘢？點得呀，而家減咗你三成人工，人又走咗咁多，工作量加你幾倍，咁就抵到爛喇。
唔知係咪踏入咗中女年紀，身邊愈來愈多90後00後出現，通常我都當佢哋係dede，小朋友，劃入friend zone，但係都出現過例外，不過自從果次之後我就怕咗啲dede，因為我好怕果種好似拖住細佬出街嘅感覺，覺得自己好似好老咁，雖然佢話完全唔介意，而且一齊嘅時候有好多反白眼嘅事發生，果陣我覺得自己喺屋企煲劇仲開心，所以最後好快就分開咗，我承認我係鍾意比人照顧多過湊仔，我無乜母愛，又或者，係我對佢根本唔夠愛。
其實我都唔係好清楚（嗱唔好打我），不過以下有幾點可以畀大家參考吓。首先，你會乜都想同佢講，就算係啲無聊低能嘢，當你工作上好大壓力或者遇到唔開心嘅事，你都會同想同佢講，因為你知道佢會靜靜哋聽你呻，雖然唔一定會幫你解決到個問題，但係女人要嘅從來都只係關心同理解，並唔係理性分析，甚至話錯嘅係你/你太緊張啫等等。
搶口罩熱潮完全無停過，我記得好早之前喺旺角藥房買咗盒口罩，果陣都仲係$60/盒，之後好快已經變到周圍都無得賣，於是我就上網睇啦，見到有啲Facebook page話留言話最快果XXX個就有，我果陣都懶懶行無理到，但係當屋企嘅口罩愈來愈少，我開始淆底，加入2盒thx行列，但係2盒thx好快又進化，除咗留言仲要like同share先有機會抽到，作為一個marketer，完全感受到當中嘅伏味，唯有再搵其他辦法。
我果陣仲係好細個，覺得「生日」係一件好重要嘅事，全家人都要隆重期待，前一晚要一齊倒數，搭正12點就同我講生日快樂，然後正日我係大晒，個個都聽晒我話，會一齊出街食大餐，返屋企再食生日蛋糕同收禮物，所以當呀媽唔記得咗我生日嘅時候我真係好嬲，發晒小姐脾氣。
