我阿媽平時好少鬧我，但嗰排佢成日都鬧我，因為我太夜瞓，我初初覺得好煩，因為返工已經夠辛苦，平時受腦細氣受客氣返到嚟仲要畀佢話，我真係寧願夜啲返等佢瞓咗鬧唔到我。有時返到屋企已經十二點，但係我仲會開電腦寫文，因為返工實在太大壓力，好想寫出嚟呻下抒發下。其實我點會唔知阿媽係怕我捱壞先鬧我，只不過當時真係「人在江湖，身不由己」啫。
「Brenda，唔好意思呀放咗工仲打畀你，阻住你拍拖添，不過有樣嘢urgent想你幫幫手。」老闆Rex說。「唔緊要，咩事？」我說，唔通我收你線咩老闆。「我有個title_board想你試下邊隻字體會好啲。」Rex說。「你想幾時要？因為我而家喺街呀。。。」我說。「ASAP啦，你whatsapp我得㗎喇。」Rex說。「OK！」我說，頂，即係即時做啦。
講開發夢，我成日都會夢見自己甩晒啲牙，一係就畀人望住我去廁所、跌落深淵（會有一下離心嚇到醒咗）、食自助餐（次次都係夾勁多嘢食但未食就醒咗）、被人/怪獸追殺等等，都唔係啲咩好夢，我上網查過，話係因為壓力大，但我又唔係好覺平時有啲咩事係好大壓力，可能係潛意識影響。
話說今日喺中環食完lunch，見有啲時間就同同事周圍行，行行下發現迎面而嚟嘅係我一個大學同學，佢著住一條連身花邊喱士短裙，身材好，化晒妝，滿口英文，同隔離貌似係佢腦細嘅鬼佬喺度傾緊計，可能佢無見到我，或者扮見我唔到，所以招呼都無打，就咁擦身而過。
成日都有人問究竟點先溝到女，型英帥靚正、大隻同有錢呢啲咁膚淺嘅嘢唔講喇，你估個個都係富二代兼吳彥祖咁款咩，現實啲啦喂！其實大部分人都係普通打工仔一個，份糧夠食夠玩夠畀家用而經好好啦，如果仲要下下送禮請食飯咁追女或者拍拖真係幾大壓力，我唔係男人所以我真係唔識講啲咩溝女必殺技，我只係可以分享下從女仔角度出發，邊啲moment會覺得好窩心，以下列舉幾個
我就係乜都會驚餐死，而阿Mike就相反，覺得船到橋到自然直，或者我悲觀少少，我覺得船到橋頭係自然撞，所以成日都覺得好無安全感，好想為自己計劃一下。有啲人係會一早為自己定下好多計劃，例如愛情上會諗定自己幾多歲拍拖，幾多歲結婚生仔，工作上就諗定幾多年後升senior，跟住幾多年後再升assistant_manager，甚至係manager，然後幾多年後就儲夠錢買樓組織小家庭。
有一日我竟然心血來潮想返去睇下懷舊下，我發現旺中原來已經唔同咗好多，最大分別係多咗好多嘢食（食評後補）。我見到好多衫都係細件到喊，根本無可能著到，而且啲款已經唔再啱我style，甚至無興趣揭嚟睇。後嚟終於見到有條連身裙幾靚，點知一拼上身，嘩，同我而家件衫差唔多長，係咪我高咗又大份咗呢？
除咗扮無力，有啲女人都好鍾意展現佢賢良淑德嘅一面。話說雖然我本身懶底，但如果成班朋友一齊去飲茶，個膠兜同壺茶又咁啱擺喺我面前，我都會主動幫手倒茶洗下啲杯杯碗碗，點知我一隻都未洗完就有個女仔爭住嚟洗。
以前我係好少同前男友（姑且叫佢X先生，新角色出現）嗌交，因為我只會做yes_girlfriend，乜都話yes，就算我唔同意佢講嘅嘢，我都唔會出聲，只會暗地裡唔gur。最初我諗住自己可以容忍到，以為乜都就晒對方就係好女友，但其實咁樣積積埋埋係會一次過爆發，然後佢就會覺得點解我之前有不滿又唔出聲，而家無啦啦又爆翻以前嘅嘢。每次我黑面，佢都會扮睇唔到
中環返工嘅打工仔通常都食過「筷子記」，咁以上嘅對話你應該唔會覺得陌生。食「筷子記」真係好似打仗咁，喺門口等位嘅時候老闆娘已經會隊疊簿仔同紅筆畀你，要你圈定食乜，然後一入到去就落單，員工九秒九就拎嘢食同嘢飲畀你，你就一路食一路聽住老闆娘鞭策佢嘅員工，帶位、落單、傳菜、執枱、抹枱、收貨，每個步驟佢都望到實一實，一秒佢都唔會放過，員工連喘息嘅機會都無，我自問真係做唔到呢份工。
「我今日絕對唔會加班！」呢句說話我聽過幾多次呢？已經多到我數唔出，咁耐以嚟，呢個承諾一次都無兌現過，係一次都無。而我就好似狼來了入面嘅村民咁，就算畀人呃過十九幾萬次，當聽到呢句「我今日絕對唔會加班！」我仍然會好傻咁仆去我男朋友公司附近等佢，諗起都覺得自己好傻仔。
其實久唔久遲到一次，十五分鐘內，我覺得係可以接受，可能真係咁啱地鐵故障，可惜有啲人已經將遲到變成習慣，基本上十次有十次都會遲，半個鐘，一個鐘都有，而且係毫無歉意嗰種，佢會好好咁預告你知佢會遲到，然後講完就覺得任務完成，遲幾多都唔緊要，佢嚟到你話佢，佢只會話：「係你早到啫！/ 我一早講咗我會遲㗎啦！」面對呢啲人其實真係幾難頂。
無論係拉麵、車仔麵、擔擔麵、喇沙，甚至係公仔麵或者杯麵，Mike都好鍾意飲晒啲湯，因為覺得夠濃夠咸好好味，而我就極少飲，頂多都係飲一兩啖，可能係因為由細到大阿媽都同我講呢啲係味精湯嚟，無益，叫我唔好飲。所以當我同Mike一齊食麵嘅時候，我成日都會叫佢唔好飲啲湯，不過我有張良計，佢有過牆梯，當就嚟食完碗麵嘅時候，佢就會好醒目咁淨係夾一兩條麵碎落個大湯匙度，然後放滿湯，我一話佢飲湯佢就好理直氣壯咁話：「啲麵未食哂喎！」
「Brenda，其實你返工有無化妝㗎？」腦細Michael突然問。「我淨係查咗少少有色防曬咋。」我說。「佢不嬲都無化妝㗎啦，80後青春吖嘛。」70後同事May說。「下！乜你連唇膏都唔查㗎？唔係掛？」90後同事Bibi驚訝地說，無啦啦佢又答嗲。
好多時聽Twins嘅歌會令我諗返起以前學生時期嘅生活係幾咁開心，嗰陣真係可以話係天真無邪，無憂無慮，唔使成日諗人哋到底諗緊乜，佢講呢句說話係真心定想串我？呢個人對我咁好有咩目的？點樣先可以上到位？頂多都係驚默書唔及格，測驗考試唔識答，或者係呷醋best_friend好似同另一個同學仔friend啲。
「初初睇陳凱琳都覺得佢幾靚，但係而家個樣好似越睇越怪。」我邊揭八卦雜誌邊說。「係囉，好怪，都唔靚嘅。」男友Mike說。然後無幾耐佢就send咗佢同陳凱琳嘅合照畀我睇，事緣係佢公司咁啱搵咗佢拍嘢，所以有機會集郵，話晒都係明星，如果換轉係我，我都會影，好正常啫。過咗幾日我哋一齊出街食飯，唔知點解佢又講起張相。「嗰日我話想同佢影相，跟住即刻個個都爭住影。」Mike說。「下？即係你係第一個主動話想同佢影相？我以為係人人都影所以你先順便影埋一份。」
